سیلاب متاثرین کے لیے ایئر لفٹ ڈرون سروس کا آغاز

پاکستان نے ریسکیو اور ریلیف آپریشنز میں ایک اہم سنگ میل عبور کرلیا۔ حکومت پنجاب نے سیلاب متاثرین کو بچانے کے لیے دنیا کی طرز پر جدید ایئر لفٹ ڈرون سروس متعارف کرا دی ہے۔ یہ منفرد ڈرون200 کلوگرام تک وزنی شخص کو محفوظ مقام پر منتقل کرنے کی صلاحیت رکھتا ہے۔

سول ڈیفنس کی ٹیسٹ فلائٹس مکمل

جنوبی پنجاب روانگی سے قبل لاہور میں سول ڈیفنس کے ماہرین نے ڈرون کی کامیاب ٹیسٹ فلائٹس کیں۔ سیکریٹری داخلہ پنجاب کے مطابق ڈرون کو فوری طور پر ملتان منتقل کرنے کی ہدایت جاری کر دی گئی ہے۔

مزید 10 ڈرونز کی خریداری کا فیصلہ

سیکریٹری داخلہ نے اعلان کیا کہ سول ڈیفنس کے لیے مزید 10 ایئر لفٹ ڈرونز خریدے جائیں گے۔ یہ پاکستان کی تاریخ میں اپنی نوعیت کی پہلی ایمرجنسی ڈرون سروس ہے، جوناقابل رسائی اور خطرناک مقامات سے ایئر ریسکیو کو ممکن بنائے گی۔