کنگ آف کامیڈی عمر شریف کی مشکل آسان، علاج کے لیے ائیرایمولینس نے کراچی میں لینڈ کرلیا جو عمر شریف کو علاج کے لیے اب واشنگٹن تک لے جائے گی۔عمر شریف جو دل کے عارضے کا شکار ہیں اور نجی اسپتال میں علاج کیاجارہا ہے۔ ان کے لیے فلائٹ آئی ایف اے 1264 فلپائنی شہر منیلا سے کراچی ائیر پورٹ پہنچی ہے۔ عمر شریف کو اتوار کی رات 11بجے امریکا روانہ کرنا تھا لیکن اُن کی طبیعت اچانک بگڑنے کے باعث فوری طور پر روانگی نہ ہوسکی۔ سندھ حکومت نے عمر شریف کے علاج معالجے کی ذمے داری اٹھائی ہے، جس کے حکم پر آن کال انٹرنیشنل بکنگ پر ائیر ایمبولینس کراچی آئی ہے۔ عمر شریف کے خاندانی ذرائع بتاتے ہیں کہ اب اُن کی حالت بہتر ہے، جنہیں ڈائیلسیز کی ضرورت نہیں۔ عمر شریف کے واشنگٹن میں معالج ڈاکٹرطارق شہاب کا کہنا ہے کہ کامیڈی کنگ کے علاج کی تمام تر تیاریاں مکمل ہیں۔ جیسے ہی وہ امریکا آئیں گے، ان کے علاج کا آغاز کردیا جائے گا۔ ائیرایمبولینس میں عمر شریف کے خاندان کا کوئی رکن سفر نہیں کرے گا، کہا جارہا ہے کہ عمر شریف کے بیٹے جواد اور اہلیہ زریں غزل کمرشل پرواز کے ذریعے امریکا کا رخ کریں گی۔
Discussion about this post