دنیا کے دولت مند شخص ایلون مسک نے گرل فرینڈ سے راہیں جدا کرلیں

گاڑیاں تیار کرنے والی کمپنی ٹیسلا اور اسپیکس ایکس کے مالک ایلون مسک اور کینڈین گلوکارہ گریمز گزشتہ 3سال سے ہر جگہ ساتھ ساتھ نظر آتے رہے ہیں لیکن اُس وقت سب حیران رہ گئے جب ایلون مسک نے گرل فرینڈ سے راہیں جدا کرنے کا اعلان کیا۔ مگر اس کے ساتھ وہ یہ بھی کہتے ہیں کہ وہ گریمز کے ساتھ تعلقات ختم کررہے ہیں لیکن وہ مشترکہ طور پر اپنے ایک سال کے بیٹے کی ذمے داری نبھاتے ہوئے والدین کا کردار ادا کرتے رہیں گے۔

ایلون کے مطابق یہ الگ ہونے کا خوشگوار اور بہترین راستہ ہے۔ گریمز کا ذکر کرتے ہوئے ایلون کا کہنا تھا کہ وہ زیادہ تر لاس اینجلز میں پیشہ ورانہ سرگرمیوں میں مصروف رہتی ہیں جبکہ انہیں ٹیسلا اور اسپیکس ایکس کے سلسلے میں ٹیکساس یا بیرون ملک کا سفر کرنا پڑتا ہے، ایسی صورتحال میں یہ تعلق جاری نہیں رہ سکتا۔ گریمز اور ایلون مسک آخری بار 13ستمبر کو میٹ گالا کہ ریڈ کارپٹ پر نظر آئے، جہاں ہاتھوں میں ہاتھ ڈال کر مسکراہٹوں کی بہار لا رہے تھے۔ ایلون مسک اس سے پہلے دو شادیاں کرچکے ہیں۔ ان کی پہلی بیوی مصنفہ جسٹن ولسن تھیں، جن سے ان کے 5بیٹے ہیں۔ اسی طرح انہوں نے اداکارہ طلاح ریلے سے بھی بیاہ رچایا۔ جبکہ ہالی وڈ سپر اسٹار امبر ہیرڈ کے ساتھ بھی مختلف تقریبات میں نظر آتے رہے ہیں۔ ایلون مسک دنیا کے دولت مند ترین شخصیات میں شمار ہوتے ہیں۔