ننھے اسٹار عمر شاہ کے آخری لمحات، چچا کی آنکھوں دیکھا حال

15 ستمبر کی رات پاکستان بھر کے دلوں پر بجلی بن کر گری، جب یہ خبر سامنے آئی کہ سوشل میڈیا اور ٹی وی اسکرینز پر سب کے چہروں پر مسکراہٹ بکھیرنے والے ننھے اسٹار عمر شاہ اچانک اس دنیا سے رخصت ہوگئے۔ عمر شاہ، جو اپنے بھائی احمد علی شاہ کے ساتھ ہر دلعزیز پروگراموں اور سوشل میڈیا پر اپنی معصوم باتوں اور شرارتوں سے سب کو محظوظ کرتے تھے، اپنے چاہنے والوں کو سوگوار چھوڑ گئے۔وسیم بادامی اور فہد مصطفیٰ جیسے بڑے ناموں نے بھی ان کے انتقال کی تصدیق کی اور بتایا کہ ڈاکٹرز کے مطابق عمر شاہ کو رات کے وقت الٹی ہوئی جو بدقسمتی سے پھیپھڑوں میں چلی گئی، آکسیجن کا نظام متاثر ہوا اور پھر انہیں اچانک Cardiac Arrest ہوا جس کے بعد وہ چند لمحوں میں زندگی کی بازی ہار گئے۔

تاہم سب سے زیادہ دل کو جھنجھوڑ دینے والی تفصیل عمر کے چچا نے حالیہ دنوں میں بیان کی۔ ان کا کہنا تھا:
"رات تک عمر بالکل خیریت سے تھے، ہنستے کھیلتے سوئے تھے۔ لیکن رات ڈھائی بجے اچانک طبیعت بگڑ گئی۔ ہم ہسپتال پہنچے مگر صرف تیس منٹ کے اندر اندر وہ سب کو روتا چھوڑ کر چلے گئے۔ یہ لمحہ ایسا تھا جسے الفاظ میں بیان نہیں کیا جا سکتا۔”

عمر کے چچا نے یہ بھی کہا کہ پورے پاکستان سے لوگوں کی کالز آ رہی ہیں، سب غم میں شریک ہیں، لیکن والدین کے صبر کا یہ سب سے بڑا امتحان ہے۔
"ہم سب سے گزارش کرتے ہیں کہ خاص طور پر عمر کے والدین کے لیے دعا کریں، یہ ان کے لیے ناقابلِ برداشت صدمہ ہے۔”

عمر شاہ کی تدفین ان کے آبائی شہر ڈیرہ اسماعیل خان میں کر دی گئی، مگر ان کی یادیں، ان کی معصوم مسکراہٹ اور ان کی آواز ہمیشہ مداحوں کے دلوں میں زندہ رہیں گی۔