پی ایس ایل کے 10 سال ، خصوصی دستاویزی فلم تیار ہوگی

پاکستان کرکٹ بورڈ (پی سی بی) نے پاکستان سپر لیگ (پی ایس ایل) کے شاندار 10 سال مکمل ہونے پر ایک خصوصی دستاویزی فلم بنانے کا فیصلہ کیا ہے۔ یہ فلم پی ایس ایل کے یادگار سفر، کامیابیوں اور درپیش چیلنجز کو ایک نئے انداز میں دنیا کے سامنے پیش کرے گی۔  یہ دستاویزی فلم 2016 سے 2025 تک کے دس سالہ سفر پر مبنی ہوگی، جس میں پی ایس ایل کے اتار چڑھاؤ اور اہم سنگ میل کو تفصیل سے دکھایا جائے گا۔ ذرائع کا کہنا ہے کہ فلم میں پی ایس ایل کی دبئی سے پاکستان واپسی کا تاریخی مرحلہ، غیر ملکی کھلاڑیوں کو قائل کرنے کی جدوجہد، اور ایونٹ کو درپیش بڑے چیلنجز کو اجاگر کیا جائے گا۔

اس کے ساتھ ساتھ کووڈ-19 کے دنوں میں پیش آنے والی مشکلات اور ان غیر معمولی حالات میں ایونٹ کو کامیابی سے جاری رکھنے کے اقدامات کو بھی نمایاں کیا جائے گا۔ دستاویزی فلم یہ بھی دکھائے گی کہ کس طرح پی ایس ایل نے صرف چند برسوں میں دنیا کی بڑی کرکٹ لیگز میں اپنی جگہ بنائی اور آج اسے دنیا کی سب سے پرکشش فرنچائز لیگز میں شمار کیا جاتا ہے۔ یہ منصوبہ نہ صرف پی ایس ایل کے مداحوں کے لیے ایک تحفہ ہے بلکہ پاکستان کرکٹ کی ایک دہائی پر مشتمل تاریخی سفر کو بھی محفوظ کر دے گا۔