اسلامی دنیا کی گرجدار آواز، ایران پر اسرائیلی حملے کی شدید مذمت

اسلامی دنیا چپ نہ بیٹھی! پاکستان سمیت 21 مسلم ممالک کے وزرائے خارجہ نے یک زبان ہو کر اسرائیل پر برس پڑے اور ایران پر حملے کو نا صرف اقوام متحدہ کے چارٹر بلکہ عالمی قوانین کی کھلی خلاف ورزی قرار دے دیا۔ یہ مشترکہ اعلامیہ کسی عام بیان بازی کا نتیجہ نہیں، بلکہ عالمی ضمیر کو جھنجھوڑنے کی ایک کوشش ہے۔ اعلامیے میں واضح طور پر کہا گیا ہے کہ 13 جون سے ایران پر کیے جانے والے اسرائیلی حملے، پورے مشرقِ وسطیٰ کے امن کو داؤ پر لگانے والی ایک نہایت خطرناک مہم جوئی ہے۔ مسلم ممالک کے وزرائے خارجہ نے دنیا کو یاد دلایا کہ علاقائی خودمختاری، ریاستی سالمیت اور پرامن ہمسائیگی کوئی کھوکھلے نعرے نہیں، بلکہ بین الاقوامی امن کی بنیاد ہیں۔ ان اصولوں کی پامالی صرف ایران کے خلاف نہیں بلکہ پوری دنیا کے امن کے منہ پر طمانچہ ہے۔ اعلامیے میں عالمی برادری سے پُرزور مطالبہ کیا گیا کہ مشرقِ وسطیٰ میں سلگتی آگ کو بجھانے کے لیے فوری جنگ بندی کرائی جائے اور سفارتی کوششوں کا آغاز کیا جائے۔ انہوں نے کہا کہ اب وقت ہے کہ طاقت کے زور پر فیصلے کرنے کی روش ختم ہو اور دنیا امن، انصاف اور باہمی احترام کی طرف لوٹے۔ اسلامی دنیا کی یہ متفقہ آواز دنیا کو یہ پیغام دے رہی ہے کہ "ظلم جہاں بھی ہو، اس کے خلاف آواز اٹھائی جائے گی۔”