لاہور : آن لائن ٹیکسی ایپ کے ذریعے لوٹ مار کرنے والا 4 رکنی گروہ پکڑا گیا

لاہور پولیس نے آن لائن ٹیکسی ایپ کے ذریعے شہریوں کو لوٹنے والے خطرناک گروہ کو گرفتار کرلیا ہے۔ حیران کن طور پر اس نیٹ ورک کا ماسٹر مائنڈ کوئی اور نہیں بلکہ کمپنی کا سافٹ ویئر آپریٹر نکلا۔ ایس پی ماڈل ٹاؤن اخلاق تارڑ نے بتایا کہ گرفتار ملزم فرحان کمپنی کے دفتر میں بطور سافٹ ویئر آپریٹر کام کرتا تھا۔ وہ اپنے ساتھیوں  کاشف، فیصل اور ولید  کے لیے جعلی اکاؤنٹس تیار کرتا، جن کے ذریعے وہ کوریئر سروسز کا بہانہ بنا کر قیمتی سامان چرا کر فرار ہو جاتے۔ پولیس کے مطابق، یہ گروہ اب تک لاکھوں روپے مالیت کی الیکٹرانک اشیا، ملبوسات اور دیگر قیمتی سامان لوٹ چکا ہے۔ کارروائی کے دوران ملزمان سے دو پستول، چوری شدہ سامان اور جعلی اکاؤنٹس کی تفصیلات بھی برآمد کرلی گئیں۔ ایس پی ماڈل ٹاؤن کا کہنا تھا کہ اس نیٹ ورک کا سراغ پولیس ٹیم کی محنت اور جدید ٹیکنالوجی کے استعمال سے ممکن ہوا۔ ان کا مزید کہنا تھا کہ شہریوں کے جان و مال کا تحفظ پولیس کی اولین ترجیح ہے، اور جرائم پیشہ عناصر کے خلاف کارروائیاں بلا امتیاز جاری رہیں گی۔