گل پلازہ سانحہ پر سعودی وزارت خارجہ کا افسوس

سعودی عرب کے فرمانروا شاہ سلمان بن عبدالعزیز کی صدارت میں ہونے والے اہم کابینہ اجلاس میں پاکستان کے ساتھ بجلی اور توانائی کے شعبے میں تعاون کو فروغ دینے کے لیے مفاہمتی یادداشت کی منظوری دے دی گئی، جسے دونوں ممالک کے تعلقات میں ایک مثبت پیش رفت قرار دیا جا رہا ہے۔ کابینہ اجلاس کے دوران علاقائی اور عالمی سیاسی صورتِ حال پر تفصیلی غور کیا گیا، جبکہ پاکستان کے ساتھ توانائی کے شعبے میں شراکت داری کو مستقبل کی ضروریات کے تناظر میں نہایت اہم قرار دیا گیا۔ اجلاس میں غزہ سے متعلق جامع امن منصوبے کے دوسرے مرحلے، فلسطینی قومی کمیٹی کے قیام اور امریکی صدر ڈونلڈ ٹرمپ کی جانب سے بورڈ آف پیس کے اعلان کا خیرمقدم بھی کیا گیا۔ سعودی کابینہ نے اس بات پر زور دیا کہ غزہ میں پائیدار امن کا قیام ناگزیر ہے اور متاثرہ آبادی تک انسانی امداد کی بلا رکاوٹ فراہمی کو یقینی بنایا جانا چاہیے۔

ادھر سعودی وزارت خارجہ نے ایک علیحدہ بیان میں کراچی میں گل پلازہ کے المناک سانحے پر گہرے دکھ اور افسوس کا اظہار کیا۔ بیان میں کہا گیا کہ اس مشکل گھڑی میں سعودی عرب متاثرہ خاندانوں کے ساتھ کھڑا ہے۔ سعودی وزارت خارجہ نے پاکستان اور پاکستانی عوام کے تحفظ، سلامتی اور خیر و عافیت کے لیے نیک تمناؤں کا بھی اظہار کیا۔