ٹریفک پولیس کا ہنگامی اقدام، طارق روڈ پر پارکنگ پر پابندی

کراچی میں موسلا دھار بارش اور اربن فلڈنگ کے امکان کے پیش نظر، ٹریفک پولیس نے ہنگامی اقدامات شروع کر دیے ہیں۔ ٹریفک پولیس کے مطابق طارق روڈ کے دونوں اطراف کو ’نو پارکنگ زون‘ قرار دے دیا گیا ہے تاکہ اگر شارعِ فیصل متاثر ہو تو طارق روڈ کو متبادل راستے کے طور پر استعمال کیا جا سکے۔ شہریوں اور مارکیٹ ایسوسی ایشنز سے اپیل کی گئی ہے کہ طارق روڈ پر گاڑیاں پارک نہ کریں تاکہ ٹریفک کی روانی برقرار رہے۔ پولیس نے شہریوں کو ہدایت کی ہے کہ بارش کے دوران احتیاط برتیں، رفتار کم رکھیں اور اچانک بریک لگانے سے گریز کریں۔

*ٹریفک الرٹ*

کراچی میں محکمہ موسمیات کی جانب سے 9 ستمبر کو ممکنہ شدید بارشوں اور اربن فلڈنگ کے پیشِ نظر شہریوں، تمام مارکیٹ ایسوسی ایشنز، ان کے ممبران اور ایڈمنز کو مطلع کیا جاتا ہے کہ طارق روڈ کی دونوں جانب مرکزی شاہراہ کو نو پارکنگ زون قرار دیا گیا ہے۔

1/2

— Karachi Traffic Police (@Khitrafficpol) September 9, 2025

محکمہ موسمیات کے مطابق بھارت کے علاقے راجستھان اور جنوب مشرقی سندھ پر موجود گہرے دباؤ کے باعث کراچی میں آج موسلا دھار بارش متوقع ہے۔ ماہرین نے امکان ظاہر کیا ہے کہ شہر میں صبح سے رات تک 4 سے 6 وقفوں میں تیز بارش ہو سکتی ہے۔ ادھر ایک روز قبل محکمہ موسمیات نے کراچی سمیت سندھ کے مختلف حصوں میں طوفانی بارشوں، تیز ہواؤں اور ممکنہ اربن فلڈنگ کی وارننگ بھی جاری کی تھی۔