کراچی کی شاہ فیصل کالونی میں واقع یونائیٹڈ ویلفیئر میڈیکل سینٹر میں ایک روزہ مفت میڈیکل کیمپ کا انعقاد کیا گیا، جس کا اہتمام لائف سول سوشل ویلفیئر میڈیکل سینٹر کی جانب سے کیا گیا۔ کیمپ میں کراچی کے معروف سرکاری و نجی اسپتالوں کے ماہر ڈاکٹرز نے شرکت کی اور مختلف بیماریوں میں مبتلا مریضوں کا مفت معائنہ کیا۔کیمپ میں لیاقت نیشنل اسپتال، جناح اسپتال، ایس آئی یو ٹی (SIUT)، این آئی سی ایچ (NICH) اور قومی ادارہ برائے امراضِ قلب (NICVD) کے ماہر ڈاکٹرز نے مختلف شعبہ جات جیسے جنرل میڈیسن، بچوں کی صحت، امراضِ قلب، گائنی اور یورالوجی میں اپنی خدمات پیش کیں۔ کیمپ میں سینکڑوں مستحق مریضوں کو مفت طبی مشورے دیے گئے اور درجنوں مریضوں کو ابتدائی تشخیص کے بعد مفت ادویات فراہم کی گئیں۔ اس موقع پر ویلفیئر ادارے کے صدر ڈاکٹر غلام رضا لاکھو، نائب صدر ڈاکٹر سمینہ سلیم اور دیگر سینئر ماہرین جیسے ڈاکٹر سونم، ڈاکٹر بتول، ڈاکٹر سہیل لاکھو اور ڈاکٹر جہانگیر موجود تھے۔ ان تمام نے کیمپ کی نگرانی کی اور مریضوں کے مسائل غور سے سنے۔ڈاکٹر غلام رضا لاکھو نے میڈیا سے بات کرتے ہوئے کہا:
"ہمارا مقصد صرف علاج مہیا کرنا نہیں بلکہ صحت کی آگاہی کو بھی فروغ دینا ہے۔ ہم چاہتے ہیں کہ غریب اور محروم طبقے کو بہتر علاج کی سہولت ان کی دہلیز پر میسر ہو۔”
انہوں نے مزید کہا کہ سندھ بھر میں ایسے کیمپس کا سلسلہ جاری رکھا جائے گا تاکہ زیادہ سے زیادہ لوگوں کو فائدہ پہنچایا جا سکے۔ مریضوں اور اہل علاقہ نے بھی اس فلاحی اقدام کو خوب سراہا۔ ایک مریض نے کہا:
"اتنے ماہر ڈاکٹر ایک جگہ جمع ہوں اور وہ بھی بغیر کسی فیس کے، یہ بہت بڑی سہولت ہے۔ ہمیں بہت فائدہ ہوا۔”
اس فری میڈیکل کیمپ کو نہ صرف طبی ماہرین نے سراہا بلکہ مقامی آبادی نے بھی بھرپور پذیرائی دی، جس سے اندازہ ہوتا ہے کہ فلاحی کاموں کی معاشرے میں کتنی گنجائش اور ضرورت موجود ہے۔
Discussion about this post