ٹیکنالوجی کمپنی میٹا نے اپنے مقبول سوشل میڈیا پلیٹ فارم انسٹاگرام پر ایک نیا فیچر "فرینڈ میپ” متعارف کرایا ہے، جو آپ کے فالورز کو نقشے پر آپ کی موجودہ لوکیشن دکھا سکتا ہے۔ اگرچہ کمپنی اسے صارفین کو قریب لانے کا نیا طریقہ قرار دے رہی ہے، لیکن کئی صارفین اور میڈیا آؤٹ لیٹس نے اسے ’پرائیویسی کے لیے خطرہ‘ قرار دیا ہے۔ یہ فیچر اُس وقت متحرک ہوتا ہے جب آپ کسی مخصوص مقام سے انسٹاگرام اسٹوری پوسٹ کرتے ہیں اور لوکیشن ٹیگ شامل کرتے ہیں۔ اس کے بعد آپ کے منتخب کردہ دوست جان سکتے ہیں کہ آپ کہاں اور کب گئے تھے۔
انسٹاگرام کا کہنا ہے کہ یہ معلومات صرف 24 گھنٹوں کے لیے نظر آتی ہیں اور صرف وہی لوگ دیکھ سکتے ہیں جنہیں آپ فالو کرتے ہیں اور جو آپ کو فالو کرتے ہیں۔ تاہم، صارفین کی ایک بڑی تعداد کا کہنا ہے کہ یہ فیچر ان کی سکیورٹی کو متاثر کر سکتا ہے۔ بعض صارفین کا الزام ہے کہ ایپ اپڈیٹ کرنے کے بعد یہ آپشن خودبخود فعال ہو جاتا ہے، حالانکہ میٹا نے وضاحت کی ہے کہ اسے صرف صارف کی مرضی سے ہی آن کیا جا سکتا ہے۔ فیچر کے متحرک ہونے کے بعد یہ انسٹاگرام میسجز کے مینو میں واضح طور پر نظر آتا ہے۔ اگر آپ نہیں چاہتے کہ آپ کی لوکیشن خود بخود شیئر ہو، تو آپ انسٹاگرام اور اپنے موبائل یا ٹیبلیٹ کی سیٹنگز سے اس آپشن کو بند یا محدود کر سکتے ہیں۔میٹا کے بیان کے مطابق، "فرینڈ میپ” صارفین کو اپنے دوستوں اور عزیز و اقارب کے ساتھ جڑنے اور رابطے مضبوط بنانے کا نیا موقع فراہم کرتا ہے۔ کمپنی کا کہنا ہے کہ لوکیشن شیئرنگ مکمل طور پر صارف کی مرضی پر ہے اور اسے کسی بھی وقت بند کیا جا سکتا ہے۔
Discussion about this post