فوڈ فیوژن کے بانیوں کی شکاگو میں پاکستانی قونصل خانے آمد

پاکستان کے معروف ڈیجیٹل ریسپی پلیٹ فارم فوڈ فیوژن کے بانی اور پروڈیوسر اسد میمن اور سعدیہ اسد نے حال ہی میں شکاگو میں قائم پاکستانی قونصل خانے کا دورہ کیا، جہاں ان کی ملاقات قونصل جنرل طارق کریم سے ہوئی۔ ملاقات کے دوران فوڈ فیوژن کی کامیاب کہانی، نمایاں سنگ میل اور پاکستانی کھانوں و ثقافت کو ڈیجیٹل میڈیا کے ذریعے عالمی سطح پر متعارف کروانے کی کاوشوں پر تفصیلی گفتگو ہوئی۔ اسد میمن اور سعدیہ اسد نے بتایا کہ کس طرح انہوں نے روایتی پاکستانی کھانوں کو جدید تقاضوں سے ہم آہنگ کرتے ہوئے نہ صرف نوجوان نسل بلکہ دنیا بھر کے ناظرین تک پہنچایا۔ قونصل جنرل طارق کریم نے فوڈ فیوژن کی خدمات کو سراہتے ہوئے کہا کہ یہ پلیٹ فارم پاکستان کے ثقافتی ورثے کو منفرد انداز میں دنیا کے سامنے پیش کر رہا ہے۔

اُنہوں نے کہا کہ ایسی تخلیقی کوششیں پاکستان کی مثبت اور متنوع شناخت کو اجاگر کرنے میں نہایت اہم کردار ادا کرتی ہیں۔ انہوں نے مزید کہا کہ فوڈ فیوژن جیسے پلیٹ فارمز "سوفٹ ڈپلومیسی” یعنی ثقافتی سفارت کاری کا مؤثر ذریعہ ہیں، جو دنیا کو پاکستان کی اصل خوبصورتی، مہمان نوازی اور ذائقوں سے روشناس کراتے ہیں۔ یہ ملاقات اس بات کا ثبوت ہے کہ کس طرح تخلیقی اور ثقافتی منصوبے پاکستان کے عالمی تشخص کو بہتر بنانے میں اہم کردار ادا کر رہے ہیں، اور قونصل خانہ ان کوششوں کی بھرپور حمایت کرتا ہے۔