برطانوی جریدے فنانشل ٹائمز نے پاکستان کے آرمی چیف اور چیف آف ڈیفنس اسٹاف فیلڈ مارشل سید عاصم منیر کو عالمی سطح پر ایک مؤثر اور بصیرت افروز اسٹریٹجک رہنما قرار دیا ہے، جو بدلتے عالمی نظام میں مڈل پاورز کے لیے کامیاب حکمت عملی کے عملی مظاہر پیش کر رہے ہیں۔ جریدے کے مطابق عالمی سیاست میں تیزی سے بدلتے حالات نے درمیانی طاقتوں کے لیے نیا اور پیچیدہ دور پیدا کیا ہے، لیکن فیلڈ مارشل سید عاصم منیر نے اس پیچیدگی میں بہترین ہم آہنگی اور مؤثر فیصلہ سازی کا مظاہرہ کیا ہے۔ فنانشل ٹائمز نے انہیں درمیانی طاقتوں کے سب سے کامیاب ملٹی الائنرز میں شمار کیا ہے۔ برطانوی جریدے نے مزید کہا کہ فیلڈ مارشل عاصم منیر نے پاکستان کی قیادت کو واشنگٹن، بیجنگ، ریاض اور تہران کے درمیان متحرک روابط کے ذریعے عالمی سفارتکاری میں کامیابی دلائی۔
امریکی صدر ڈونلڈ ٹرمپ کے ساتھ ان کی ہم آہنگی کو بھی ایک نمایاں کارنامہ قرار دیا گیا۔ فنانشل ٹائمز کے مطابق پاکستان کی مؤثر سفارتکاری نے بھارت کو مایوس کیا، کیونکہ ہندوستان بدلتے عالمی حالات اور ٹرمپ کے انداز سے ہم آہنگ نہیں ہو سکا، جس کے باعث اسے مڈل پاور حکمت عملی میں متعدد مشکلات کا سامنا ہے۔ اس کے علاوہ، فیلڈ مارشل سید عاصم منیر کو سعودی عرب کے اعلیٰ ترین اعزاز کنگ عبدالعزیز میڈل سے بھی نوازا گیا، جو ان کی قیادت اور بین الاقوامی تعلقات میں مہارت کا اعتراف ہے۔
فنانشل ٹائمز نے نتیجہ اخذ کیا کہ فیلڈ مارشل عاصم منیر نہ صرف پاکستان کی سفارتکاری کی کامیاب مثال ہیں بلکہ بدلتے عالمی ماحول میں مڈل پاورز کے لیے ایک مؤثر اور قابل تقلید ماڈل بھی پیش کرتے ہیں۔
Discussion about this post