جنوبی وزیرستان کی سنگلاخ وادیوں میں دشمن کے ناپاک عزائم کے خلاف سینہ سپر ہوکر لڑنے والے پاک فوج کے بہادر افسر، میجر سید معیز عباس شاہ مادرِ وطن پر قربان ہو گئے۔ بھارتی سرپرستی میں پلنے والے فتنۂ الخوارج کے خلاف آپریشن کے دوران شہید ہونے والے اس جری سپاہی کی نمازِ جنازہ چکلالہ گیریژن، راولپنڈی میں ادا کی گئی۔ نماز جنازہ میں چیف آف آرمی اسٹاف فیلڈ مارشل سید عاصم منیر، وفاقی وزیر داخلہ محسن نقوی، اعلیٰ عسکری و سول حکام، افسران، جوانوں اور شہید کے رفقاء نے بڑی تعداد میں شرکت کی۔ ہر آنکھ اشکبار تھی، ہر دل پر فخر کا سایہ تھا۔ آئی ایس پی آر نے بتایا کہ اس موقع پر فیلڈ مارشل عاصم منیر نے کہا:
"میجر معیز عباس نے دشمن کے خلاف جوانمردی سے لڑتے ہوئے جان کا نذرانہ پیش کیا۔ ان کی شہادت ایثار، بہادری اور حب الوطنی کی روشن مثال ہے۔ قوم ان پر نہ صرف فخر کرتی ہے بلکہ اُن کے اہلِ خانہ کے ساتھ شانہ بشانہ کھڑی ہے۔ ہم اپنے شہداء کے احسانات کا بدلہ نہیں چکا سکتے، کیونکہ انہی کے خون سے ہماری قومی وحدت کی بنیاد مضبوط ہوئی ہے۔”
میجر معیز عباس شاہ، جن کا تعلق ضلع چکوال سے تھا، محض 37 برس کی عمر میں شہادت کا رتبہ پا گئے۔ ان کی میت مکمل فوجی اعزاز کے ساتھ ان کے آبائی علاقے روانہ کر دی گئی، جہاں انہیں سپردِ خاک کیا جائے گا۔ اُن کی یہ لازوال قربانی آنے والی نسلوں کو وطن کے لیے جینے اور مر مٹنے کا درس دیتی رہے گی۔
Discussion about this post