پاکستان کے ہوائی اڈوں پر جدید ای گیٹس کی تنصیب

پاکستان کے تین بڑے بین الاقوامی ہوائی اڈوں ، اسلام آباد، کراچی اور لاہور   پر ای گیٹس نصب کرنے کے منصوبے میں نمایاں پیش رفت ہوئی ہے۔ پاکستان ایئرپورٹس اتھارٹی (PAA) کے مطابق، حالیہ دنوں جرمنی سے آنے والے ماہرین نے دورہ پاکستان کے دوران اس جدید نظام کے بنیادی ڈیزائن کو حتمی شکل دے دی ہے۔ ترجمان پی اے اے کا کہنا ہے کہ "ای گیٹس کی تنصیب سے مسافروں کو امیگریشن کے عمل میں خودکار اور برق رفتار سہولت میسر آئے گی، جس سے نہ صرف ان کا قیمتی وقت بچے گا بلکہ امیگریشن کا عمل مزید مؤثر، شفاف اور محفوظ ہو جائے گا۔” اس سلسلے میں ایک تین روزہ ورکشاپ بھی منعقد کی گئی، جس میں جرمن ماہرین نے منصوبے سے متعلق تمام اسٹیک ہولڈرز سے تفصیلی مشاورت مکمل کی۔ ایئرپورٹس اتھارٹی نے واضح کیا کہ یہ منصوبہ پاکستان کے ہوائی اڈوں کو عالمی معیار سے ہم آہنگ کرنے کی ایک اہم اور دور رس کوشش ہے۔ ترجمان نے مزید بتایا کہ ای گیٹس نہ صرف جدید ٹیکنالوجی سے لیس ہوں گے بلکہ یہ نظام قابلِ توسیع اور مکمل طور پر محفوظ بھی ہوگا۔ منصوبے پر کام کرنے والے بین الاقوامی کنسلٹنٹس معاہدے کے تحت ذمہ داریوں کو بخوبی نبھا رہے ہیں، اور مجموعی پیش رفت کو "اطمینان بخش” قرار دیا گیا ہے۔ پی اے اے کے مطابق، ای گیٹس کا نفاذ پاکستان میں ہوائی سفر کے ایک نئے اور ترقی یافتہ دور کا آغاز ہو گا، جس سے مسافروں کے سفر کا معیار بلند ہو گا اور ایئرپورٹ کے مجموعی آپریشنز میں نمایاں بہتری آئے گی۔