ابوظہبی میں ’اسکویڈ گیم’ کا مقابلہ لیکن خون خرابے کے بغیر

کورین ویب سیریز ’اسکویڈ گیم‘ نے دنیا بھر میں تہلکہ مچادیا ہے۔ ہر کوئی اس تخلیق کے سحر میں کھو سا گیا۔ جس میں ایکشن ہی نہیں، ایڈونچر اور قدم قدم پر خون خرابے کے مناظر کے باوجود اسے پسندیدگی کی سند مل رہی ہے۔ یہی وجہ ہے کہ ’نیٹ فلیکس‘ کی یہ اب تک کی بہترین کاروبار کرنے والی ویب سیریز تصور کی جارہی ہے۔ 9اقساط پر مبنی فلم کی اسی شہرت اور مقبولیت کا فائدہ اٹھاتے ہوئے ابوظہبی کے کورین کلچر سینٹر میں اہتمام ہورہا ہے، اس ویب سیریز میں دکھائے اور کھیلے جانے والے مختلف مقابلوں کا۔ لیکن اس بات کو یقینی بنایا گیا ہے کہ یہ مقابلے فلم کے برعکس تشدد اور خون خرابے کے بغیر ہی ہوں۔

عرب میڈیا رپورٹس کے مطابق یہ ایونٹ اس منگل کو ہوگا۔ جس میں اس میں شریک امیدواروں کو ’اسکویڈ گیم‘ میں کھیلے جانے والے ریڈ لائٹ گرین لائٹ، ڈالگونا کینڈی چیلنج اور ماربلز گیم کھیلنے کا موقع ملے گا۔ کہا جارہا ہے کہ حقیقی زندگی میں ’اسکویڈ گیم‘ کے2 ورژن پر مشتمل سیشن ہوں گے اور ہر سیشن کے لیے 15امیدواروں کو دعوت دی جائے گی۔ جو خواہش مند ان مقابلوں میں حصہ لینا چاہتے ہیں، ان کورجسٹریشن کے عمل میں 3 سوالات کا فارم بھرنا ہوگا۔

ایونٹ کا عملہ گلابی، دائرے، مثلث اور مربع کے نشان والے ملبوسات زیب تن کریں گے۔ جو فلم میں ڈیتھ گیمز کے دوران گارڈز نے پہنا تھا۔ متحدہ عرب امارات میں ’اسکویڈ گیم‘ کے اِن کھیلوں کو حقیقی انداز سے کھیلنے کے لیے عوام کا غیر معمولی جوش و خروش ہے۔

اسی بارے میں مزید جاننے کے لیے کلک کریں:

آخر ’اسکویڈ گیم‘ نے کیوں سب کو دیوانہ بنادیا؟