مسٹر بین جیسے ہم شکل باپ اور بیٹی؟

برطانوی کامیڈین مسٹر بین کی عجیب و غریب احمقانہ حرکات و سکنات کا دنیا بھر میں چرچا رہتا ہے۔ کئی ایسے چہرے ہیں، جو مسٹربین سے اس قدر مشابہت رکھتے ہیں کہ انہی جیسی حرکتیں کرکے شہرت کا سفر طے کررہے ہیں لیکن کیا تصور کیا ہے کوئی ایسی بھی لڑکی ہوگی جو مسٹر بین کی ہم شکل ہوگی اور ساتھ ان کی طرح اوٹ پٹانگ شرارتیں کرکے سب کو لوٹ پوٹ کررہی ہوگی؟۔ یقینی طور پر ایسا ہی ہے اور وہ اطالوی دوشیزہ فابیولا بیگلیری ہیں۔ جن کے ساتھ ٹک ٹاک پر جو صاحب اُنہی کی طرح مسٹر بین بن کر نٹ کھٹ حرکتیں کرتے ہیں، انہیں سبھی فابیولا کے والد خیال کرتے ہیں کیونکہ وہ بھی ہو بہو مسٹر بین جیسے جو ہیں۔

اٹلی میں ان دونوں کی جوڑی ’ڈبل بین‘ کے نام سے مشہور ہے۔ جو ٹک ٹاک پر مختلف ویڈیوز بنا کر اپ لوڈ کرتے رہتے ہیں اور دونوں کے فالورز کی تعداد لاکھوں میں بتائی جاتی ہے۔

کیا واقعی دونوں باپ اور بیٹی ہیں؟
ہر کوئی اس مغالطے کا شکار ہوجاتا ہے۔بہت سارے صارفین سمجھتے ہیں کہ یہ دونوں باپ اور بیٹی ہی ہیں جبکہ حقیقت میں ایسا نہیں، فابیولا ٹک ٹاکر کے ساتھ مشہور ماڈل بھی ہیں، جن کی ملاقات ایک شو کے دوران مسٹر بین کے ہم شکل کامیڈین آرنلڈ منگنی سے ہوئی اور دونوں نے مل کر ایک نئے آئیڈیا پر کام کا آغاز کیا۔

فابیولا میں کسی حد تک مسٹر بین جیسی مشابہت تھی، جنہیں تھوڑا بہت میک اپ کا رنگ دے کر اور پکا کردیا گیا۔ جس کے بعد دونوں مل کر ایسا ظاہر کرتے ہیں کہ جیسے وہ باپ اور بیٹی ہوں۔ اب مسٹر بین کے چاہنے والے تو ان کے بھی پرستار بن گئے ہیں۔ جن کی ہر ویڈیو کو لاکھوں صارفین دیکھتے ہیں اور اسی اعتبار سے ’لائیکس‘ بھی ملتے ہیں۔ مسٹر بین کے بہروپیے آرنلڈ منگنی اٹلی کے کئی کنسرٹس میں حصہ لیتے ہیں اور ہنسا ہنسا کر پیٹ میں بل ڈال دیتے ہیں۔

جہاں تک بات فابیولا کی ہے، تو جس طرح وہ بدشکل ہو کر مسٹر بین کی ویڈیوز میں آتی ہیں، ایسی وہ نہیں بلکہ خاصی پرکشش اور حسین ماڈل ہیں، جن کے انداز دلوں کو گھائل کردیتے ہیں۔