محکمہ سکول ایجوکیشن پنجاب نے والدین کے دلوں کو ہلا دینے والے واقعات کے بعد ایک اہم اور سخت اقدام اٹھا لیا ہے۔ چھٹی کے بعد طلبہ کے اسکول میں رہ جانے کے متعدد افسوسناک واقعات سامنے آنے پر محکمہ نے فوری نوٹس لیتے ہوئے تمام سرکاری اور پرائیویٹ اسکولوں کے لیے حفاظتی ہدایات جاری کر دی ہیں۔ مراسلے کے مطابق اب ہر اسکول میں روزانہ ایک ٹیچر یا اسٹاف ممبر کو خصوصی طور پر مقرر کیا جائے گا جو طلبہ کے مکمل اور محفوظ انخلا کی نگرانی کرے گا۔ جب تک آخری طالب علم بھی اسکول سے باہر نہ چلا جائے، متعلقہ اسٹاف اسکول نہیں چھوڑ سکے گا۔ حکام نے واضح ہدایات جاری کی ہیں کہ چھٹی کے فوراً بعد کلاس رومز، واش رومز، لیبارٹریز، لائبریری اور گراؤنڈز کی مکمل تلاشی لازمی ہوگی۔ اس بات کو یقینی بنایا جائے کہ کوئی بھی بچہ اسکول کی عمارت یا احاطے میں نہ رہ جائے۔ اگر ان ہدایات کی خلاف ورزی ہوئی تو اسکول پرنسپل یا ہیڈ ماسٹر پر مکمل ذمہ داری عائد ہوگی اور ان کے خلاف سخت کارروائی کی جائے گی۔
محکمہ نے تمام ڈسٹرکٹ ایجوکیشن آفیسرز (ڈی ای اوز) کو فوری طور پر تمام اسکولوں تک یہ احکامات پہنچانے کی ہدایت کر دی ہے۔ سخت مانیٹرنگ کے ذریعے 100 فیصد عملدرآمد یقینی بنایا جائے گا اور تمام اسکولوں سے 24 گھنٹوں کے اندر عملدرآمد کی رپورٹ طلب کر لی گئی ہے۔یہ فیصلہ والدین کے لیے بڑی خوشخبری ہے۔ اب بچوں کی حفاظت کو کوئی بھی غفلت برداشت نہیں کی جائے گی۔ پنجاب کے محکمہ تعلیم نے واضح پیغام دے دیا ہے کہ اسکول صرف تعلیم کا مرکز نہیں، بلکہ بچوں کی محفوظ پناہ گاہ بھی ہے۔
Discussion about this post