واٹس ایپ اکاؤنٹس : نیشنل سرٹ کی ایڈوائزری

واٹس ایپ اکاؤنٹس کی ہیکنگ اور سائبر دھوکہ دہی کے واقعات میں خطرناک حد تک اضافہ دیکھنے کے بعد نیشنل سرٹ نے اہم ایڈوائزری جاری کر دی ہے۔ نیشنل سرٹ نے عوام کو واٹس ایپ ہیکنگ اور آن لائن فراڈ سے بچاؤ کے لیے سخت احتیاطی تدابیر اپنانے کی ہدایت کی ہے۔ایڈوائزری میں واضح طور پر کہا گیا ہے کہ کبھی بھی اپنا اوٹی پی، پن کوڈ یا کوئی بھی ذاتی معلومات کسی کے ساتھ شیئر نہ کریں، چاہے وہ آپ کا کتنا ہی قریبی دوست یا رشتہ دار کیوں نہ ہو۔ نامعلوم نمبروں سے آنے والے کسی بھی لنک پر کلک کرنے سے مکمل گریز کریں اور کسی بھی قسم کی رقم کی درخواست آنے پر فوری طور پر کال کر کے تصدیق ضرور کریں۔ نیشنل سرٹ نے تمام واٹس ایپ صارفین سے اپیل کی ہے کہ وہ فوری طور پر اپنے اکاؤنٹ پر ٹو اسٹیپ ویریفیکیشن (Two-Step Verification) فعال کر لیں۔ اسے ڈیجیٹل ڈھال قرار دیتے ہوئے کہا گیا ہے کہ یہ اضافی حفاظتی تہہ اوٹی پی کے غلط ہاتھ لگنے کے باوجود بھی آپ کے واٹس ایپ اکاؤنٹ کو محفوظ رکھنے میں اہم کردار ادا کرتی ہے۔