کراچی : فینسی نمبر پلیٹس والی موٹرسائیکلوں اور گاڑیوں کیخلاف کریک ڈاؤن کا فیصلہ

کراچی پولیس نے ایک بڑا اور فیصلہ کن قدم اٹھاتے ہوئے اعلان کیا ہے کہ 30 مارچ 2026 سے شہر بھر میں فینسی، پرائیویٹ اور غیر منظور شدہ نمبر پلیٹس والی گاڑیوں اور موٹر سائیکلوں کے خلاف سخت ترین کریک ڈاؤن شروع کر دیا جائے گا۔ ایڈیشنل آئی جی کراچی آزاد خان کی ہدایات پر عمل کرتے ہوئے پولیس نے واضح پیغام دے دیا ہے کہ اب کوئی رعایت نہیں، کوئی لاپرواہی برداشت نہیں کی جائے گی۔ترجمان کراچی پولیس چیف کا کہنا ہے کہ شہری فوراً اپنی گاڑیوں پر حکومت کی منظور شدہ سرکاری نمبر پلیٹس لگوا لیں، کیونکہ پرائیویٹ اور فینسی نمبر پلیٹس کا استعمال نہ صرف غیر قانونی ہے بلکہ شہر کی سیکیورٹی اور قانون کی عملداری کے لیے بھی سنگین خطرہ بن چکا ہے۔

جعلی یا فینسی نمبر پلیٹس کی وجہ سے مجرموں کی شناخت میں دشواری ہوتی ہے، جرائم بڑھتے ہیں اور عام شہریوں کی زندگی خطرے میں پڑ جاتی ہے۔ اب یہ سلسلہ ختم ہونے جا رہا ہے۔ 30 مارچ سے پولیس کی جانب سے بلا امتیاز مہم چلائی جائے گی۔ جو بھی اس قانون کی خلاف ورزی کرے گا، اس کے خلاف سخت قانونی کارروائی کی جائے گی، چاہے وہ کوئی بھی ہو۔ کراچی پولیس نے شہریوں سے اپیل کی ہے کہ ابھی وقت ہے، پریشانی سے بچنے کے لیے آج ہی اپنی چھوٹی بڑی گاڑیوں اور موٹر سائیکلوں کی نمبر پلیٹس تبدیل کروا لیں اور صرف سرکاری، معیاری نمبر پلیٹس ہی استعمال کریں۔