لاہور میں بسنت کے رنگ عروج پر

لاہور کا آسمان ایک بار پھر رنگ برنگی پتنگوں سے جگمگا اٹھا ہے، جہاں تین روزہ بسنت فیسٹیول کا شاندار آغاز ہو چکا ہے اور شہر کی گلیوں میں خوشی کی لہریں دوڑ رہی ہیں۔آئی جی پنجاب راؤ عبدالکریم نے لاہور پولیس کو سخت ہدایات جاری کرتے ہوئے کہا ہے کہ 6، 7 اور 8 فروری کے دوران بسنت کو مکمل طور پر محفوظ، پرجوش اور خوشگوار بنانے کے لیے تمام ایس او پیز پر انتہائی سختی سے عملدرآمد یقینی بنایا جائے۔ انہوں نے واضح کیا کہ دھاتی، کیمیکل یا کسی بھی ممنوعہ ڈور کے استعمال پر زیرو ٹالرنس پالیسی اپنائی جائے گی اور ایسی خلاف ورزیوں پر فوری اور سخت قانونی کارروائی کی جائے گی تاکہ کوئی ناخوشگوار واقعہ پیش نہ آئے۔

ایئرپورٹ، فضائی راستوں، حساس تنصیبات اور ممنوعہ علاقوں میں پتنگ بازی پر مکمل پابندی برقرار رکھی گئی ہے، جبکہ علامہ اقبال انٹرنیشنل ایئرپورٹ کے اطراف اور طیاروں کے ٹیک آف اور لینڈنگ ایریاز میں یہ پابندی سختی سے نافذ العمل ہے۔ ان علاقوں میں نادرآباد، گلشن علی کالونی، علی ویو، نشاط کالونی، بھٹہ چوک، ڈی ایچ اے کے بلاکس پی، کیو، آر اور ایس، الفیصل ٹاؤن، جوڑے پل، تاجپورہ سے ملحقہ کینال بینک روڈ اور دیگر متعلقہ مقامات شامل ہیں جہاں پتنگ بازی کی اجازت بالکل نہیں ہے۔ یہ پابندی پاکستان ایئرپورٹس اتھارٹی کی ایوی ایشن سیفٹی کی سفارشات اور پنجاب کائٹ فلائنگ ایکٹ کے تحت حکومتی منظوری سے جاری کی گئی ہے تاکہ فلائٹ آپریشنز کو کسی بھی خطرے سے محفوظ رکھا جا سکے۔

آئی جی پنجاب نے پولیس افسران کو تاکید کی ہے کہ تین روزہ جشن کے دوران حکومتی ضابطہ اخلاق کی مکمل چیکنگ کی جائے، شہری قیمتی انسانی جانوں کے تحفظ کے لیے ذمہ داری کا مظاہرہ کریں اور قوانین کی پابندی کو یقینی بنائیں تاکہ یہ ثقافتی میلہ یادگار اور بغیر کسی حادثے کے مکمل ہو۔ لاہور اب رنگوں، خوشیوں اور احتیاط کے امتزاج سے جگمگا رہا ہے، جہاں بسنت کی روایت زندہ ہو چکی ہے اور پنجاب پولیس اسے محفوظ بنانے کے لیے دن رات ایک کیے ہوئے ہے۔