پی آئی اے کے کرایوں میں خصوصی رعایت کا اعلان

پی آئی اے نے مسافروں کے لیے خوشخبری کا اعلان کرتے ہوئے کرایوں میں خصوصی رعایت متعارف کرائی ہے۔ترجمان کے مطابق پیرس سے پاکستان کے مختلف شہروں کے لیے سفر کرنے والے مسافر اب 10 فیصد ڈسکاؤنٹ سے فائدہ اٹھا سکتے ہیں۔ یہ رعایت خاص طور پر سمندر پار پاکستانیوں کے لیے سفر کو آسان اور اقتصادی بنانے کے مقصد سے دی گئی ہے۔ پی آئی اے نے واضح کیا کہ یہ ڈسکاؤنٹ صرف پیرس سے پاکستان آنے والے مسافروں پر لاگو ہوگا۔ مسافر اس رعایت کے تحت اپنی ٹکٹ بکنگ 10 فروری 2026 تک کروا سکتے ہیں۔ رعایت یکم فروری سے 10 مارچ 2026 اور یکم مئی سے 15 مئی 2026 کے دوران ہونے والے سفر کے لیے دستیاب ہوگی۔ پی آئی اے کے ترجمان نے بتایا کہ مسافر سرکاری بکنگ دفاتر، ویب سائٹ، موبائل ایپ یا مستند ٹریول ایجنٹس کے ذریعے اس خصوصی رعایت سے مستفید ہو سکتے ہیں۔انہوں نے مزید کہا کہ پی آئی اے اپنی روایتی مہمان نوازی کے ساتھ مسافروں کو اعلیٰ معیار کی سفری سہولیات فراہم کرنے کے لیے ہمیشہ سرگرم ہے۔