بلوچستان: 2 کارروائیوں میں بھارتی پراکسی تنظیموں کے 41 دہشتگرد ہلاک

پاک فوج کے شعبہ تعلقات عامہ آئی ایس پی آر نے اعلان کیا ہے کہ 29 جنوری کو بلوچستان میں دو علیحدہ کارروائیوں کے دوران بھارتی حمایت یافتہ 41 دہشت گرد ہلاک کر دیے گئے۔ آئی ایس پی آر کے مطابق پہلی کارروائی ضلع ہرنائی کے نواحی علاقے میں خفیہ اطلاعات پر کی گئی، جہاں سیکیورٹی فورسز نے دہشت گردوں کے ٹھکانے کو بھرپور انداز میں نشانہ بنایا۔ ہرنائی میں شدید فائرنگ کے تبادلے کے دوران بھارتی سرپرستی میں سرگرم 30 خوارج جہنم واصل ہوئے۔ دوسری کارروائی ضلع پنجگور میں کی گئی، جس میں فتنہ الہندوستان سے تعلق رکھنے والے 11 دہشت گرد ہلاک کر دیے گئے۔ ہلاک دہشت گرد ماضی میں متعدد دہشت گردانہ کارروائیوں میں ملوث تھے اور دونوں کارروائیوں میں ہلاک دہشت گردوں سے بڑی مقدار میں اسلحہ اور دھماکا خیز مواد برآمد کیا گیا، جسے موقع پر ہی تلف کر دیا گیا۔آئی ایس پی آر نے مزید بتایا کہ پنجگور سے برآمد ہونے والی رقم 15 دسمبر 2025ء کو اسی علاقے میں ہونے والی بینک ڈکیتی سے تعلق رکھتی ہے۔ پاک فوج کا کہنا ہے کہ علاقے میں مزید بھارتی حمایت یافتہ دہشت گردوں کے خاتمے کے لیے کلیئرنس آپریشن جاری ہے، اور سیکیورٹی فورسز ہر ممکن اقدامات کر رہی ہیں تاکہ عوام کی جان و مال محفوظ رہ سکے۔ یہ کارروائیاں پاکستان کی سرحدی سلامتی اور دہشت گردی کے خاتمے کے لیے عزم کی علامت ہیں، اور اس بات کا واضح پیغام بھی دیتی ہیں کہ دشمن کے منصوبے کسی صورت کامیاب نہیں ہونے دیں گے۔