گوگل کا نیا فوٹو فیچر

گوگل نے اپنی مشہور فوٹو اسٹوریج سروس گوگل فوٹوز میں ایک نیا جنریٹو اے آئی فیچر متعارف کرایا ہے، جس کا نام "می میمی” رکھا گیا ہے۔ اس فیچر کی مدد سے صارفین اپنی ذاتی تصاویر کو مزاحیہ میمز کی شکل میں تبدیل کر سکتے ہیں، جس سے گوگل فوٹوز میں تصویروں کے ساتھ تخلیقی اور دلچسپ تجربے کا امکان پیدا ہوتا ہے۔ میم بنانے کا طریقہ کار انتہائی آسان ہے: سب سے پہلے صارف ایک میم اسٹائل ٹیمپلیٹ منتخب کرے گا یا اپنی پسند کا ٹیمپلیٹ اپلوڈ کرے گا، پھر اپنی تصویر شامل کرے گا، اور گوگل کی اے آئی اس تصویر کو مزاحیہ شکل میں تیار کر دے گی۔ گوگل کا کہنا ہے کہ یہ فیچر تجرباتی ہے، یعنی بعض اوقات نتیجہ بالکل اصلی تصویر جیسا نہیں نکل سکتا۔ بہتر نتائج کے لیے صاف، روشن اور سامنے والی تصویر استعمال کرنا ضروری ہے۔

یہ فیچر فی الحال صرف امریکہ میں اینڈرائیڈ اور آئی او ایس صارفین کے لیے دستیاب ہے اور گوگل فوٹوز کے کریئیٹ ٹیب میں دکھائی دے گا۔ میم تیار ہونے کے بعد اسے محفوظ کیا جا سکتا ہے، شیئر کیا جا سکتا ہے یا دوبارہ تخلیق بھی کیا جا سکتا ہے۔گوگل کے مطابق یہ فیچر صارفین کو صرف تصاویر ذخیرہ کرنے تک محدود نہیں رکھتا، بلکہ انہیں تصویروں کے ساتھ کھیلنے اور مزاح پیدا کرنے کا بھی موقع فراہم کرتا ہے۔