کراچی میں سردی کب تک رہے گی ؟

کراچی میں بلوچستان کی یخ بستہ ہواؤں کے اثرات کے باعث سردی کی شدت برقرار ہے، اور آئندہ 24 گھنٹوں کے دوران موسم جزوی طور پر ابر آلود، خشک اور سرد رہنے کا امکان ہے۔محکمہ موسمیات کے مطابق آج شہر میں کم سے کم درجہ حرارت 11.5 ڈگری سینٹی گریڈ ریکارڈ کیا گیا، جبکہ کل یہ درجہ حرارت 9 سے 11 ڈگری سینٹی گریڈ کے درمیان رہنے کی توقع ہے۔ گزشتہ روز شہر میں زیادہ سے زیادہ درجہ حرارت 21.8 ڈگری سینٹی گریڈ ریکارڈ ہوا اور آج زیادہ سے زیادہ درجہ حرارت 20 سے 22 ڈگری سینٹی گریڈ تک پہنچ سکتا ہے۔

محکمہ موسمیات نے آگاہ کیا ہے کہ کراچی میں سردی کی یہ حالیہ لہر جنوری کے اختتام تک جاری رہنے کا امکان ہے۔ آج شمال مشرقی سمت سے چلنے والی سرد اور خشک ہواؤں کی رفتار 20 تا 40 کلو میٹر فی گھنٹہ متوقع ہے، جو سردی کے اثر کو مزید بڑھا دے گی۔ ہوا میں نمی کا تناسب آئندہ 24 گھنٹوں کے دوران 20 سے 50 فیصد رہنے کا امکان ہے، اور آج صبح حدِ نگاہ 4 کلومیٹر جبکہ نمی کا تناسب 46 فیصد ریکارڈ کیا گیا۔