آسٹریلیا کے خلاف پاکستانی اسکواڈ کا اعلان

آسٹریلیا کے خلاف تین میچز پر مشتمل ٹی ٹوئنٹی سیریز سے قبل پاکستانی شائقین کے لیے خوشخبری آ گئی ہے، قومی ٹیم میں بڑے اور مقبول ناموں کی شاندار واپسی نے سیریز کا رنگ ہی بدل دیا ہے۔پاکستان کرکٹ بورڈ نے آسٹریلیا کے خلاف ٹی ٹوئنٹی سیریز کے لیے 16 رکنی قومی اسکواڈ کا اعلان کر دیا ہے، جس میں تجربے اور نوجوان جوش کا خوبصورت امتزاج نظر آتا ہے۔ اس سیریز میں قومی ٹیم کی قیادت سلمان علی آغا کے سپرد کی گئی ہے، جو اپنی آل راؤنڈ صلاحیتوں کے باعث ٹیم کو متوازن انداز میں لیڈ کرنے کی صلاحیت رکھتے ہیں۔ اسکواڈ کی سب سے نمایاں خبر بابر اعظم اور شاہین شاہ آفریدی کی ٹی ٹوئنٹی ٹیم میں واپسی ہے۔ بابر اعظم کی شمولیت بیٹنگ لائن کو ایک بار پھر مضبوط سہارا فراہم کرے گی، جبکہ شاہین شاہ آفریدی کی برق رفتار گیند بازی آسٹریلوی بیٹنگ کے لیے بڑا چیلنج ثابت ہو سکتی ہے۔ آسٹریلوی ٹیم سیریز میں شرکت کے لیے 28 جنوری کو پاکستان پہنچے گی، جبکہ دونوں ٹیموں کے درمیان ٹی ٹوئنٹی سیریز کا آغاز 29 جنوری سے ہوگا۔

🇵🇰 16-member squad unveiled for the 3-match T20I series vs Australia at Gaddafi Stadium, Lahore 🏟️

Read More: https://t.co/jXpe1oEAjx#PAKvAUS #BackTheBoysInGreen pic.twitter.com/ewr8yJFRLL

— Pakistan Cricket (@TheRealPCB) January 23, 2026

سیریز کا دوسرا میچ 31 جنوری اور تیسرا اور آخری میچ یکم فروری کو کھیلا جائے گا۔ سیریز کے تمام میچز قذافی اسٹیڈیم لاہور میں شام چار بجے شروع ہوں گے، جہاں شائقین کو ہائی وولٹیج مقابلے دیکھنے کو ملیں گے۔ قومی ٹیم کے اعلان کردہ اسکواڈ میں سلمان علی آغا (کپتان)، فخر زمان، صائم ایوب، بابر اعظم، شاداب خان، شاہین شاہ آفریدی، نسیم شاہ، فہیم اشرف، محمد وسیم جونیئر، محمد سلمان مرزا، ابرار احمد، محمد نواز، عثمان طارق، خواجہ محمد نافع، صاحبزادہ فرحان اور عثمان خان شامل ہیں۔ آسٹریلیا کے خلاف یہ سیریز نہ صرف ٹیم کمبی نیشن کو آزمانے کا بہترین موقع ہے بلکہ آئندہ بڑے ایونٹس سے قبل قومی ٹیم کے اعتماد کو بھی نئی پرواز دینے کی صلاحیت رکھتی ہے