ٹک ٹاک کا امریکی پابندیوں سے بچنے کیلئے جوائنٹ وینچر

معروف ویڈیو ایپلیکیشن ٹک ٹاک کے صارفین کے لیے ایک بڑی خوشخبری سامنے آئی ہے۔ بائٹ ڈانس، ٹک ٹاک کے چینی مالک نے امریکی پابندیوں سے بچنے اور عالمی صارفین کے اعتماد کو یقینی بنانے کے لیے امریکا کے ساتھ ایک نئی جوائنٹ وینچر ڈیل کر لی ہے۔ کمپنی نے واضح کیا کہ امریکی اکثریتی جوائنٹ وینچر کے تحت ٹک ٹاک اب امریکی صارفین کے ڈیٹا، ایپس اور الگورتھم کو سخت ڈیٹا پرائیویسی اور سائبر سیکیورٹی اقدامات کے ذریعے مکمل طور پر محفوظ کرے گا۔ اس نئے معاہدے کے مطابق امریکی اور بین الاقوامی سرمایہ کار نئی کمپنی میں 80.1 فیصد شیئرز کے مالک ہوں گے، جبکہ بائٹ ڈانس 19.9 فیصد شیئرز برقرار رکھے گا۔ امریکی صدر ڈونلڈ ٹرمپ نے اس معاہدے پر خوشی کا اظہار کرتے ہوئے کہا کہ انہوں نے ٹک ٹاک کو بچانے میں ایک اہم کردار ادا کیا ہے۔

صدر ٹرمپ نے سوشل میڈیا پر جاری بیان میں کہا کہ یہ اب دنیا کے سب سے بڑے امریکی محب وطن سرمایہ کاروں کے گروپ کی ملکیت میں ہوگا اور ایک اہم عالمی آواز بنے گا۔ انہوں نے یہ بھی کہا کہ مستقبل میں ٹک ٹاک کے صارفین انہیں اس تاریخی اقدام کے لیے یاد رکھیں گے۔ صدر ٹرمپ نے چینی صدر شی جن پنگ کا بھی شکریہ ادا کیا اور کہا کہ اگرچہ وہ کسی اور فیصلہ کر سکتے تھے، مگر انہوں نے اس معاہدے کی منظوری دی، جس کے لیے ان کی قدر کی جانی چاہیے۔ اس جوائنٹ وینچر میں کلاؤڈ کمپیوٹنگ کی بڑی کمپنی اوریکل، پرائیویٹ ایکویٹی گروپ سلور لیک اور ابوظبی کی ایم جی ایکس بھی شامل ہیں، جو اس معاہدے کی کامیابی اور ٹک ٹاک کے مستقبل کے استحکام کی ضمانت ہیں۔