موبائل فون پر ٹیکسز میں کمی نہیں کی، پی ٹی اے

پاکستان ٹیلی کمیونیکیشن اتھارٹی نے سوشل میڈیا پر موبائل فون پر ٹیکسز میں کمی سے متعلق گردش کرنے والی خبروں کی سختی سے تردید کرتے ہوئے واضح کیا ہے کہ اس حوالے سے پھیلائی جانے والی معلومات بے بنیاد، غلط اور گمراہ کن ہیں۔ پی ٹی اے کی جانب سے جاری کردہ بیان میں کہا گیا ہے کہ سوشل میڈیا پلیٹ فارمز پر موبائل فون پر مبینہ ٹیکس کمی، درآمد کنندگان اور صارفین کے لیے ہدایات سے منسوب کیا جانے والا نوٹیفکیشن جعلی ہے، جس کا کسی بھی سرکاری ادارے سے کوئی تعلق نہیں اور نہ ہی اس کی کوئی قانونی حیثیت ہے۔ اتھارٹی نے دوٹوک الفاظ میں وضاحت کی ہے کہ موبائل فون پر عائد ٹیکسز میں اس وقت کسی قسم کی کمی نہیں کی گئی اور اس حوالے سے پھیلائی جانے والی خبریں محض افواہوں پر مبنی ہیں۔

دوسری جانب پی ٹی اے نے اوورسیز پاکستانیوں کی سہولت کے لیے ایک اہم فیصلہ بھی کیا ہے، جس کا مقصد بیرونِ ملک مقیم پاکستانیوں کو درپیش ٹیلی کمیونیکیشن سے متعلق امور میں آسانی فراہم کرنا ہے۔ پی ٹی اے نے عوام، درآمد کنندگان اور کاروباری حلقوں پر زور دیا ہے کہ وہ غیر مصدقہ اطلاعات اور سوشل میڈیا پر وائرل ہونے والی خبروں پر ہرگز یقین نہ کریں، اور کسی بھی قسم کی درست معلومات کے لیے صرف پی ٹی اے یا متعلقہ سرکاری اداروں کے مستند ذرائع سے رجوع کریں۔