تارکین وطن کو موبائل فون سروس میں تسلسل کی سہولت فراہم کرنے کا اعلان

پاکستان ٹیلی کمیونیکیشن اتھارٹی (پی ٹی اے) نے بیرونِ ملک مقیم پاکستانیوں کے لیے خوشخبری سناتے ہوئے ایک اہم فیصلہ کیا ہے۔ اب تارکین وطن اپنی موبائل فون سروس میں تسلسل برقرار رکھ سکیں گے اور بیرون ملک قیام کے دوران ان کی پاکستانی موبائل سم بلاک نہیں کی جائے گی۔ پی ٹی اے کے مطابق سمندر پار پاکستانی اپنی موبائل فون سم کی ملکیت برقرار رکھ سکیں گے اور اس سہولت سے فائدہ اٹھانے کے لیے وہ متعلقہ موبائل کمپنی سے رابطہ کر سکتے ہیں۔ اس اقدام کے ذریعے بیرون ملک پاکستانی ضروری مواصلاتی سہولیات تک بغیر رکاوٹ رسائی حاصل کر سکیں گے اور اپنے اہلِ خانہ اور دوستوں سے رابطے میں رہیں گے۔ پی ٹی اے کے ترجمان نے بتایا کہ اتھارٹی بیرون ملک پاکستانیوں کو بااختیار بنانے کے لیے پرعزم ہے اور عالمی سطح پر ڈیجیٹل رابطوں کے فروغ کے لیے مستقل طور پر متحرک ہے۔یہ قدم نہ صرف تارکین وطن کے لیے سہولت کا باعث ہے بلکہ پاکستان کے ڈیجیٹل رابطوں کو عالمی سطح پر مزید مستحکم اور مربوط بنانے کی جانب ایک نمایاں اقدام بھی ہے۔