پاکستان نے بھارتی آرمی چیف کے الزامات مسترد کر دیے

پاکستان نے بھارتی آرمی چیف کے حالیہ الزامات کو یکسر مسترد کرتے ہوئے کہا ہے کہ یہ دہشت گردی کے الزامات سیاسی مقاصد کے لیے گھڑی گئی من گھڑت کہانیوں پر مبنی ہیں۔ اسلام آباد میں ہفتہ وار پریس بریفنگ کے دوران ترجمان دفتر خارجہ طاہر حسین اندرابی نے واضح کیا کہ پاکستان کی دہشت گردی کے خلاف قربانیاں عالمی سطح پر تسلیم شدہ ہیں اور بھارت کی جانب سے لگائے گئے الزامات حقیقت سے دور، پرانے اور گمراہ کن ہیں۔ ان کا کہنا تھا کہ پاکستان کے خلاف بھارتی الزامات خود بھارت کی ساکھ کو نقصان پہنچا رہے ہیں اور بین الاقوامی برادری کے لیے یہ قابل فہم نہیں ہیں۔ ترجمان نے بھارتی قومی سلامتی کے مشیر کے متنازع بیان پر تشویش کا اظہار بھی کیا اور کہا کہ بھارت کی جانب سے تاریخ کا بدلہ لینے کے دعوے خطے میں کشیدگی بڑھانے والے ہیں۔ انہوں نے مزید کہا کہ بھارت کے حمایت یافتہ دہشت گرد نیٹ ورکس کی سرگرمیاں، خاص طور پر افغانستان میں، واضح ہیں اور پاکستان نے اس سلسلے میں اپنی معلومات عالمی سطح پر پیش کی ہیں۔ اندرابی نے بھارت میں ماورائے عدالت قتل اور ریاستی سرپرستی میں دہشت گردی کی مثالیں بھی یاد دلاتے ہوئے کہا کہ پاکستان نے بھارت کو انتہاپسندانہ بیانات سے باز رہنے اور مہذب بین الریاستی رویوں کی پابندی کرنے کا مشورہ دیا ہے۔ انہوں نے انتباہ کیا کہ غیر ذمہ دارانہ الزامات خطے میں کشیدگی کو مزید بڑھا سکتے ہیں اور اس کے منفی اثرات پورے جنوبی ایشیا پر مرتب ہوں گے۔