ٹرمپ کا انجام فرعون، نمرود اور رضا شاہ جیسا ہوگا

ایران کے سپریم لیڈر آیت اللہ علی خامنہ ای نے امریکی صدر ڈونلڈ ٹرمپ پر سخت تنقید کرتے ہوئے کہا ہے کہ تاریخ کا انجام فرعون، نمرود اور رضا شاہ جیسے حکمرانوں کے لیے ایک جیسا رہا، اور یہی انجام غرور میں مبتلا موجودہ طاقتوں کا بھی ہو سکتا ہے۔ سوشل میڈیا پر جاری اپنے بیان میں آیت اللہ خامنہ ای نے کہا کہ ایک شخص خود کو پوری دنیا کے فیصلوں کا مالک سمجھ بیٹھا ہے، حالانکہ ماضی گواہ ہے کہ اقتدار کے نشے میں مست حکمران ہمیشہ زوال کا شکار ہوئے ہیں۔ انہوں نے زور دیا کہ ظلم، تکبر اور طاقت کے گھمنڈ پر کھڑی حکومتیں زیادہ عرصہ قائم نہیں رہ سکتیں اور بالآخر تاریخ کے کٹہرے میں آ جاتی ہیں۔دوسری جانب ایرانی صدر مسعود پزشکیان نے امریکا اور اسرائیل پر ایران میں عدم استحکام پیدا کرنے کے سنگین الزامات عائد کیے ہیں۔

ایرانی میڈیا سے گفتگو کرتے ہوئے صدر پزشکیان کا کہنا تھا کہ دونوں ممالک تخریب کاری کو ہوا دے رہے ہیں اور عوام کو انتشار کی طرف دھکیلنے کی کوشش کر رہے ہیں۔ انہوں نے واضح الفاظ میں کہا کہ ایران کسی بھی غیر ملکی طاقت کو اپنے اندرونی معاملات میں مداخلت کی اجازت نہیں دے گا اور امن و امان کو نقصان پہنچانے والوں سے آہنی ہاتھوں سے نمٹا جائے گا۔ اسی دوران امریکی صدر ڈونلڈ ٹرمپ نے دعویٰ کیا ہے کہ ایران بات چیت میں دلچسپی رکھتا ہے اور ملاقات کے لیے انتظامات پر کام جاری ہے۔ صدر ٹرمپ کے مطابق امریکا ایران کے معاملے پر کئی سخت اور مؤثر آپشنز پر سنجیدگی سے غور کر رہا ہے، جن میں تمام امکانات زیرِ بحث ہیں۔