پاکستان نے ایران میں جاری مظاہروں کے پیشِ نظر اپنے شہریوں کو غیر ضروری سفر سے گریز کرنے کی ہدایت کر دی ہے۔ دفتر خارجہ کی جانب سے جاری ایڈوائزری میں کہا گیا ہے کہ “اپنی حفاظت اور سلامتی کے پیشِ نظر حالات بہتر ہونے تک اسلامی جمہوریہ ایران کا تمام غیر ضروری سفر مؤخر کریں۔” ایڈوائزری میں مزید کہا گیا کہ ایران میں مقیم پاکستانی شہری انتہائی احتیاط کریں، چوکنا رہیں اور غیر ضروری نقل و حرکت محدود رکھیں۔ ساتھ ہی دفتر خارجہ نے شہریوں کی سہولت کے لیے پاکستانی سفارتی مشنز سے رابطے کے نمبرز بھی جاری کیے ہیں تاکہ وہ کسی بھی ہنگامی صورتحال میں فوری مدد حاصل کر سکیں۔ ایران میں مہنگائی کے خلاف احتجاجی مظاہرے مسلسل 13 روز سے جاری ہیں اور وقت کے ساتھ اس تحریک میں مذہبی نظام کے خاتمے کے مطالبات بھی زور پکڑتے جا رہے ہیں۔
ان مظاہروں کے دوران ایرانی حکام نے سخت کریک ڈاؤن کیا ہوا ہے، جس میں درجنوں افراد ہلاک ہو چکے ہیں اور انٹرنیٹ کی سروس محدود یا بند رکھی گئی ہے۔ جمعے کو بھی ایرانی شہری بڑے پیمانے پر سڑکوں پر نکلے تاکہ اپنی تحریک کو آگے بڑھا سکیں۔ یہ اقدام پاکستان کی طرف سے اپنے شہریوں کی حفاظت کو یقینی بنانے اور ممکنہ خطرات سے خبردار کرنے کے لیے کیا گیا ہے۔
Discussion about this post