ٹی 20 ٹیم آف دی ایئر کا اعلان، کوئی پاکستانی شامل نہیں

عالمی کرکٹ کی معروف ویب سائٹ کرک انفو نے سال 2025 کے لیے اپنی ٹی ٹوئنٹی ٹیم آف دی ایئر جاری کر دی ہے، لیکن حیران کن طور پر اس اعزازی فہرست میں پاکستان کا کوئی بھی کھلاڑی جگہ بنانے میں ناکام رہا، جس نے شائقینِ کرکٹ کو مایوس کر دیا ہے۔ منتخب ٹیم پر نظر ڈالیں تو بھارت اور انگلینڈ کو سب سے زیادہ نمائندگی ملی ہے، جہاں دونوں ممالک کے تین، تین کھلاڑی شامل کیے گئے ہیں۔ ویسٹ انڈیز کے دو کھلاڑی اس فہرست کا حصہ بنے، جبکہ آسٹریلیا، افغانستان اور جنوبی افریقہ کو ایک، ایک کھلاڑی کے ذریعے نمائندگی دی گئی ہے۔ بیٹنگ لائن میں بھارت کے ابھرتے ہوئے اسٹار ابھیشک شرما، انگلینڈ کے جارح اوپنر فل سالٹ اور تجربہ کار جوز بٹلر شامل ہیں۔ ویسٹ انڈیز کے پاور ہٹر نکلوس پوران اور جنوبی افریقہ کے نوجوان بلے باز ڈیوالڈ بریوس کو بھی شاندار کارکردگی کے باعث منتخب کیا گیا ہے۔آل راؤنڈ اور باؤلنگ شعبے میں آسٹریلیا کے ٹم ڈیوڈ، انگلینڈ کے سیم کرن اور ویسٹ انڈیز کے جیسن ہولڈر کو ٹیم کا حصہ بنایا گیا ہے۔ بولنگ اٹیک میں افغانستان کے اسپنر نور احمد، بھارت کے ورن چکرورتھی اور فاسٹ بولر جسپریت بمرا کو شامل کیا گیا ہے۔ ٹی ٹوئنٹی فارمیٹ کے اس معتبر انتخاب میں کسی بھی پاکستانی کھلاڑی کی عدم موجودگی نے ایک بار پھر قومی ٹیم کی حالیہ کارکردگی اور تسلسل پر سوالات کھڑے کر دیے ہیں، اور شائقین کو مستقبل کے لیے سنجیدہ غور و فکر پر مجبور کر دیا ہے۔