کراچی سے ڈھاکہ کی براہ راست پرواز بہت جلد

پاکستان کے ہائی کمشنر برائے بنگلہ دیش عمران حیدر نے اعتماد کا اظہار کیا ہے کہ ڈھاکہ اور کراچی کے درمیان براہِ راست فضائی رابطہ آئندہ سال جنوری میں بحال ہوجائے گا، جس سے دونوں ممالک کے عوام اور کاروباری حلقوں کے درمیان آمدورفت میں نمایاں سہولت پیدا ہوگی۔ انہوں نے یہ بات اتوار کو ڈھاکہ کے اسٹیٹ گیسٹ ہاؤس میں چیف ایڈوائزر پروفیسر ڈاکٹر محمد یونس سے ہونے والی خیرسگالی ملاقات کے  دوران کہی، جہاں دوطرفہ تعلقات کو مزید مضبوط اور ہمہ جہت بنانے پر تفصیلی تبادلۂ خیال کیا گیا۔ ملاقات میں اس بات پر اتفاق کیا گیا کہ تجارت، سرمایہ کاری اور ہوابازی کے شعبوں میں تعاون کو وسعت دے کر پاکستان اور بنگلہ دیش کے باہمی روابط کو نئی رفتار دی جائے۔ اس کے ساتھ ساتھ ثقافتی، تعلیمی اور طبی میدانوں میں تعاون بڑھانے کی اہمیت پر بھی زور دیا گیا۔

Flash: Dhaka-Karachi direct flights are expected to start in January, Pakistan’s envoy to Bangladesh Imran Haider tells Yunus in a meeting earlier today pic.twitter.com/Xuz5vmsRL9

— Sidhant Sibal (@sidhant) December 28, 2025

ہائی کمشنر عمران حیدر نے بتایا کہ گزشتہ برس کے مقابلے میں دونوں ممالک کے درمیان تجارتی حجم میں 20 فیصد اضافہ ہوا ہے، جو بڑھتے ہوئے معاشی اعتماد اور مضبوط ہوتے روابط کی عکاسی کرتا ہے۔ انہوں نے کہا کہ پاکستان اور بنگلہ دیش کی کاروباری برادریاں نئی سرمایہ کاری اور مشترکہ منصوبوں کے امکانات پر سرگرمی سے کام کر رہی ہیں۔ ثقافتی اور تعلیمی روابط پر روشنی ڈالتے ہوئے انہوں نے کہا کہ بنگلہ دیش کے طلبہ پاکستان میں اعلیٰ تعلیم حاصل کرنے میں بڑھتی ہوئی دلچسپی کا اظہار کر رہے ہیں، بالخصوص میڈیکل سائنسز، نینو ٹیکنالوجی اور مصنوعی ذہانت جیسے جدید اور اہم شعبوں میں۔ انہوں نے یہ بھی بتایا کہ جگر اور گردوں کی پیوندکاری کے لیے پاکستان آنے والے بنگلہ دیشی مریضوں کی تعداد میں مسلسل اضافہ ہو رہا ہے، جبکہ پاکستان اس شعبے میں طبی تربیت، مہارتوں کی منتقلی اور تعلیمی تعاون فراہم کرنے کے لیے مکمل طور پر تیار ہے۔

چیف ایڈوائزر پروفیسر ڈاکٹر محمد یونس نے دونوں ممالک کے درمیان بڑھتے ہوئے روابط کو خوش آئند قرار دیتے ہوئے سارک رکن ممالک کے مابین سفری سہولتوں میں اضافے پر زور دیا۔ انہوں نے کہا کہ عوامی سطح پر روابط کے فروغ سے نہ صرف ثقافتی ہم آہنگی بڑھے گی بلکہ خطے میں تعاون کی نئی راہیں بھی کھلیں گی۔پروفیسر یونس نے اس امید کا بھی اظہار کیا کہ ہائی کمشنر عمران حیدر کی تعیناتی کے دوران پاکستان اور بنگلہ دیش کے درمیان تجارتی سرگرمیوں کو مزید فروغ ملے گا اور سرمایہ کاری و مشترکہ کاروباری منصوبوں کے نئے مواقع سامنے آئیں گے۔