پاک بھارت جنگ میں 8 طیارے گرائے گئے

امریکی ریاست فلوریڈا میں ایک شاندار تقریب سے خطاب کرتے ہوئے امریکی صدر ڈونلڈ ٹرمپ نے عالمی سیاست اور عسکری طاقت کے حوالے سے بڑے دعوے کرتے ہوئے کہا کہ ان کی کوششوں سے دنیا میں آٹھ بڑی جنگیں رکیں، جن میں سب سے زیادہ خطرناک پاک بھارت جنگ تھی۔ ان کے بقول اگر یہ جنگ آگے بڑھتی تو اس کے تباہ کن اثرات صرف خطے تک محدود نہ رہتے بلکہ پوری دنیا کو اپنی لپیٹ میں لے لیتے۔صدر ٹرمپ نے بتایا کہ مئی میں ہونے والی اس کشیدگی کے دوران آٹھ جنگی طیارے تباہ ہوئے، جبکہ اس موقع پر انہوں نے فیلڈ مارشل عاصم منیر کی شخصیت کو خراجِ تحسین پیش کرتے ہوئے انہیں نہایت باوقار اور قابلِ احترام رہنما قرار دیا۔ اپنے خطاب میں امریکی صدر نے کہا کہ امریکی بحریہ دنیا کی سب سے طاقتور اور منظم بحری قوت ہے۔ انہوں نے اعلان کیا کہ امریکی فوج میں دنیا کا جدید ترین طیارہ بردار جہاز شامل کیا جا رہا ہے، کیونکہ امریکا کو جدید تقاضوں کے مطابق نئے بحری جہازوں کی اشد ضرورت تھی۔

صدر ٹرمپ کے مطابق امریکی آبدوزیں دنیا کی سب سے جدید ہیں اور آبدوز سازی کے میدان میں امریکا دیگر تمام ممالک سے کم از کم پندرہ سال آگے ہے۔ انہوں نے اعتماد کے ساتھ کہا کہ امریکا کے پاس دنیا کے بہترین ہتھیار اور جدید ترین عسکری آلات موجود ہیں۔ امریکی صدر نے جدید طیارہ بردار جہازوں کی تیاری کا اعلان کرتے ہوئے بتایا کہ پندرہ جدید ترین آبدوزیں اس وقت تیاری کے مراحل میں ہیں، جبکہ امریکا کا جدید بحری بیڑا ایسا ہے جس کا دنیا میں کوئی ثانی نہیں۔ ان کے بقول یہ بحری طاقت امریکا کے دشمنوں کے دلوں میں خوف پیدا کرنے کے لیے کافی ہے۔ صدر ٹرمپ نے مزید دعویٰ کیا کہ کیریئبین میں سمندری راستوں سے منشیات کی اسمگلنگ میں حیران کن طور پر 96.2 فیصد کمی واقع ہوئی ہے۔ ان کا کہنا تھا کہ جو ممالک اور عناصر چند سال پہلے امریکا کا مذاق اڑاتے تھے، آج وہ امریکا کا احترام کرتے ہیں، اور چین و روس بھی آبدوزوں کے شعبے میں امریکا کا مقابلہ نہیں کر سکتے۔ انہوں نے بتایا کہ امریکی بحریہ کے ہیڈکوارٹر کو جدید خطوط پر بہتر بنایا جا رہا ہے اور سمندر کے راستے منشیات اسمگل کرنے والی کشتیوں کو براہِ راست نشانہ بنایا جا رہا ہے۔ صدر ٹرمپ کے مطابق امریکا میں منشیات کے داخلے کو ہر صورت روکا جا رہا ہے اور منشیات سے بھری کشتیوں کو سمندر میں ہی تباہ کیا جا رہا ہے۔ اپنے خطاب میں انہوں نے کہا کہ گزشتہ سال امریکا میں منشیات کے استعمال کے باعث تین لاکھ افراد جان سے ہاتھ دھو بیٹھے، تاہم منشیات کی کشتیوں کو تباہ کر کے ہر بار تقریباً پچیس ہزار قیمتی جانیں بچائی جاتی ہیں۔ ان کا کہنا تھا کہ آج امریکا کی سرحدیں محفوظ اور معیشت مضبوط بنیادوں پر کھڑی ہے۔ صدر ٹرمپ نے بحریہ کو جدید ترین ٹیکنالوجی سے آراستہ کرنے اور نیوی کے لیے گولڈن فلیٹ کے قیام کا بھی اعلان کیا۔ انہوں نے کہا کہ نیا بحری جہاز کسی بھی موجودہ جہاز کے مقابلے میں سو گنا زیادہ طاقتور ہوگا، جبکہ وکٹری نامی جہاز امریکی فوج کی عسکری برتری کو برقرار رکھنے میں کلیدی کردار ادا کرے گا۔ صدر ٹرمپ کے مطابق یہ منصوبہ نہ صرف امریکا کی دفاعی صلاحیت میں بے پناہ اضافہ کرے گا بلکہ امریکی جہاز سازی کی صنعت کو بھی نئی زندگی بخشنے میں اہم ثابت ہوگا۔