فیلڈ مارشل اور لیبیا کے آرمی چیف کی ملاقات ، دفاعی شراکت داری کو فروغ دینے پر اتفاق

چیف آف ڈیفنس اسٹاف فیلڈ مارشل سید عاصم منیر نے لیبیا کا سرکاری دورہ کیا، جہاں انہیں لیبیئن عرب مسلح افواج کے کمانڈر اِن چیف اور ڈپٹی کمانڈر اِن چیف نے انتہائی شاندار انداز میں خوش آمدید کہا۔دورے کے دوران دونوں ممالک کے اعلیٰ عسکری حکام نے علاقائی سیکیورٹی اور باہمی دلچسپی کے امور پر مفصل اور تعمیری تبادلہ خیال کیا، جس میں دوطرفہ دفاعی اور عسکری تعاون کے نئے مواقع بھی زیر غور آئے۔ فیلڈ مارشل سید عاصم منیر کو لیبیئن افواج کے چاق و چوبند دستے نے شاندار گارڈ آف آنر پیش کیا، جس سے پاک-لیبیا تعلقات میں اعتماد اور بھائی چارے کی نمایاں جھلک سامنے آئی۔

ملاقات میں تربیت، استعداد کار بڑھانے اور انسداد دہشت گردی کے شعبوں میں تعاون کی اہمیت پر بھرپور زور دیا گیا، جبکہ فیلڈ مارشل نے مشترکہ مفادات کی بنیاد پر پاک-لیبیا دفاعی تعلقات کو مزید مضبوط بنانے کے عزم کا اعادہ کیا۔ آئی ایس پی آر کے مطابق لیبیئن کمانڈر اِن چیف نے پاکستان مسلح افواج کی پیشہ ورانہ مہارت کو سراہا اور دفاعی تعاون کو مزید وسعت دینے کی خواہش ظاہر کی، جس سے دونوں ملکوں کے درمیان مضبوط اور دیرپا عسکری روابط کے نئے دروازے کھل گئے ہیں۔