مسیحی ملازمین اور پنشنرز کے لیے کرسمس پر بڑا ریلیف

وفاقی حکومت نے کرسمس کے پرمسرت موقع پر مسیحی برادری کے لیے خوش خبری سناتے ہوئے ایک اہم اور خوش آئند فیصلہ کر لیا ہے، جس کے تحت مسیحی برادری سے تعلق رکھنے والے وفاقی ملازمین اور پنشنرز کو مالی سہولت فراہم کی جائے گی۔وزارت خزانہ کے مطابق مسیحی برادری کے تمام اہل وفاقی ملازمین اور پنشنرز کی دسمبر 2025ء کی تنخواہیں اور پنشنز مقررہ وقت سے قبل ایڈوانس ادا کی جائیں گی۔ اس اقدام کا مقصد یہ ہے کہ مسیحی ملازمین اور پنشنرز کرسمس کی مذہبی تقریبات اور تیاریوں کو بغیر کسی مالی پریشانی کے خوش اسلوبی سے مکمل کر سکیں۔ اعلامیے میں بتایا گیا ہے کہ تنخواہوں اور پنشنز کی ادائیگی 22 دسمبر کو کی جائے گی، تاکہ مسیحی برادری کو اپنے تہوار کی خوشیوں میں بھرپور سہولت میسر آ سکے۔ حکومت کے اس فیصلے کو بین المذاہب ہم آہنگی اور اقلیتی برادریوں کے احترام کی ایک خوبصورت مثال قرار دیا جا رہا ہے۔ وزارت خزانہ نے کنٹرولر جنرل اکاؤنٹس اسلام آباد کو پیشگی ادائیگیوں کے تمام انتظامات بروقت مکمل کرنے کی ہدایت جاری کر دی ہے، جبکہ واضح کیا گیا ہے کہ اس فیصلے کا اطلاق مسیحی برادری سے تعلق رکھنے والے تمام اہل وفاقی ملازمین اور پنشنرز پر یکساں طور پر ہوگا۔