پاسپورٹ کی آن لائن تصدیق کا نیا نظام

ڈی جی امیگریشن اینڈ پاسپورٹس کی مؤثر کاوشوں اور نادرا کے اشتراک سے پاسپورٹ کے حصول کے عمل میں ایک بڑی سہولت متعارف کرا دی گئی ہے، جس کے تحت آن لائن فنگر پرنٹس تصدیق کا نیا اور جدید نظام فعال کر دیا گیا ہے۔ تفصیلات کے مطابق ملک بھر میں آن لائن پاسپورٹ کے لیے درخواست دینے والے شہریوں کو درپیش فنگر پرنٹس کی تصدیق سے متعلق تکنیکی مسائل بالآخر حل کر لیے گئے ہیں، جس کے بعد پاسپورٹ کے حصول کا عمل مزید آسان اور تیز ہو گیا ہے۔ اب پاسپورٹ درخواست گزار نادرا کی پاک آئی ڈی ایپ کے ذریعے گھر بیٹھے فنگر پرنٹس کی تصدیق باآسانی کر سکیں گے، جبکہ فنگر پرنٹس کی تصدیق میں کسی بھی مشکل کی صورت میں چہرے کی تصدیق کا متبادل آپشن بھی فراہم کر دیا گیا ہے۔

اس موقع پر ڈی جی پاسپورٹس مصطفیٰ جمال قاضی نے کہا کہ شہریوں کو سہولت فراہم کرنا ان کی اولین ترجیح ہے اور جدید تقاضوں کے مطابق مزید آسان اور مؤثر سروسز متعارف کروانے کے لیے ادارہ ہر ممکن اقدامات کر رہا ہے۔ خصوصی طور پر اوورسیز پاکستانیوں کی جانب سے آن لائن فنگر پرنٹس کی تصدیق میں مشکلات کی شکایات موصول ہو رہی تھیں، جن کے حل کے بعد بیرونِ ملک مقیم پاکستانی اور سینئر شہری اس نئی سہولت سے سب سے زیادہ مستفید ہو سکیں گے۔ یہ اقدام نہ صرف پاسپورٹ کے نظام کو جدید خطوط پر استوار کرنے کی جانب ایک اہم قدم ہے بلکہ عوامی سہولت اور ڈیجیٹل پاکستان کے وژن کو بھی مضبوط بناتا ہے۔