اسلام آباد میں بلدیاتی انتخابات 15 فروری کو ہوں گے

الیکشن کمیشن آف پاکستان نے اسلام آباد میں بلدیاتی انتخابات کی تاریخ کا باضابطہ اعلان کر دیا ہے، جس کے مطابق وفاقی دارالحکومت میں مقامی حکومتوں کے انتخابات 15 فروری 2026 کو ہوں گے۔ اس حوالے سے تفصیلی شیڈول بھی جاری کر دیا گیا ہے۔ الیکشن کمیشن کے مطابق ریٹرننگ افسران 19 دسمبر کو کاغذاتِ نامزدگی کے لیے پبلک نوٹس جاری کریں گے، جبکہ امیدوار 22 سے 27 دسمبر تک اپنے کاغذات جمع کرا سکیں گے۔ نامزدگیوں کی جانچ پڑتال 30 دسمبر سے 3 جنوری 2026 تک مکمل کی جائے گی۔ شیڈول کے تحت اپیلیں 5 سے 8 جنوری تک دائر کی جا سکیں گی، جنہیں الیکشن ٹربیونلز 9 سے 13 جنوری تک نمٹا دیں گے۔ کاغذات نامزدگی واپس لینے کی آخری تاریخ 15 جنوری 2026 مقرر کی گئی ہے، اور اسی کے بعد 16 جنوری کو امیدواروں کی حتمی فہرست جاری کی جائے گی۔ انتخابی نشانات بھی اسی روز الاٹ کیے جائیں گے۔ الیکشن کمیشن کے مطابق پولنگ 15 فروری کو صبح 8 بجے شروع ہو کر شام 4 بجے تک بلا تعطل جاری رہے گی، جب کہ نتائج کی تیاری کا عمل 16 فروری سے 19 فروری تک مکمل کیا جائے گا۔اسلام آباد میں بلدیاتی انتخابات کے اس شیڈول کے اعلان کے بعد انتخابی سرگرمیوں میں واضح تیزی آنے کا امکان ہے، اور مختلف جماعتیں اپنی حکمت عملی کو حتمی شکل دینے میں مصروف ہو گئی ہیں۔