پاکستان کی معاشی سمت مستقل بہتری کی جانب بڑھ رہی ہے

وزیراعظم محمد شہباز شریف نے یقین کا اظہار کیا ہے کہ وہ وقت اب زیادہ دور نہیں جب پاکستان مکمل طور پر قرضوں سے نجات پاکر ایک خودمختار اور مضبوط معیشت کے طور پر ابھرے گا۔ انہوں نے کہا کہ اللہ کے فضل سے ملک ایک ایسے دور سے گزَر رہا ہے جہاں معاشی استحکام محض خواب نہیں رہا بلکہ حقیقت بن کر سامنے آرہا ہے۔ آئی ایم ایف کی جانب سے معاشی اصلاحات کے مؤثر نفاذ پر اعتماد اور جاری پروگرام کے تحت مالی اجراء کو وزیراعظم نے معاشی ٹیم کی انتھک محنت اور درست سمت کی پالیسیوں کا نتیجہ قرار دیا۔ ان کے مطابق وزیر خزانہ محمد اورنگزیب اور ان کی ٹیم نے مشکل حالات میں بھی وہ کارنامہ سرانجام دیا جسے عالمی اداروں نے بھی سراہا۔ وزیراعظم نے واضح کیا کہ اصلاحاتی ایجنڈے کے نفاذ میں فیلڈ مارشل سید عاصم منیر، چیف آف آرمی اسٹاف و چیف آف ڈیفنس فورسز کی حمایت اور رہنمائی نے فیصلہ کن کردار ادا کیا۔ انہوں نے کہا کہ سول اور عسکری قیادت نے مل کر وہ بنیاد رکھ دی ہے جس پر پاکستان کی معاشی سمت مستقل بہتری کی جانب بڑھ رہی ہے۔ شہباز شریف نے کہا کہ ڈیفالٹ کے دہانے سے ملک کو نکال کر استحکام اور پھر ترقی کی جانب گامزن کرنا ایک مشکل مرحلہ تھا۔ اس سفر میں سیاسی قوتوں نے اپنے مفادات قربان کیے، قوم نے مشکلات برداشت کیں، اور سب نے مل کر ناممکن کو ممکن بنایا۔وزیراعظم نے کہا کہ آج پاکستان کی معاشی اصلاحات اور ڈیجیٹائزیشن عالمی سطح پر ایک کامیاب مثال کے طور پر سامنے آرہی ہیں، اور کئی ممالک پاکستان کے ماڈل کو سیکھنے میں دلچسپی دکھا رہے ہیں۔ ان کے مطابق معاشی ترقی کا خواب اب حقیقت کے بہت قریب ہے۔ انہوں نے کہا کہ استحکام کے بعد اب ترقی کی جانب بڑھتا ہوا پاکستان مزید محنت اور عزم کا تقاضا کرتا ہے۔ بطور خادم پاکستان، میں قوم کی خوشحالی، مضبوط معیشت اور بیرونی قرضوں سے مکمل نجات کے لیے اپنی جدوجہد جاری رکھوں گا۔