جنوبی افریقہ نے بھارت کو اس کی ہی سرزمین پر ایک تاریخی شکست دے کر 25 سال بعد ٹیسٹ سیریز اپنے نام کر لی۔ گوہاٹی ٹیسٹ میں جنوبی افریقہ نے بھارت کو 408 رنز سے شکست دی، جس کے ساتھ ہی دو میچوں کی سیریز میں وائٹ واش بھی مکمل ہو گئی۔ مہمان ٹیم نے پہلی اننگز میں 489 رنز کا مضبوط اسکور کیا، جس میں سینوران متھوسامی نے 109 اور مارکو یانسن نے 93 رنز بنا کر ٹیم کو طاقتور بنیاد فراہم کی۔
بھارتی ٹیم اپنی پہلی اننگز میں صرف 201 رنز بنا سکی اور پھر فالو آن کے باوجود دوسری اننگز میں بھی 140 رنز پر ڈھیر ہو گئی۔ یہ بھارت کی ٹیسٹ کرکٹ میں رنز کے لحاظ سے سب سے بڑی شکست ہے۔ جنوبی افریقہ نے اپنی دوسری اننگز میں 5 وکٹ پر 260 رنز بنا کر اننگز ڈکلیئر کر دی، اور بھارت کو 549 رنز کے تعاقب کے لیے دیا گیا۔ بھارتی بلے باز اسپنرز کے سامنے بے بس نظر آئے، کپتان رشابھ پانت صرف 13 رنز بنا کر آؤٹ ہوئے، جبکہ دیگر کھلاڑی بھی کم رنز پر پویلین لوٹ گئے۔
سائمن ہارمر نے کیریئر کی بہترین بولنگ کرتے ہوئے 6 وکٹیں حاصل کیں، کیشو مہاراج نے 3 اور سینوران متھوسامی نے ایک وکٹ حاصل کی۔ بھارت کی جانب سے رویندرا جدیجا نے 4 اور واشنگٹن سندر نے ایک وکٹ حاصل کی۔ اس شاندار فتح کے ساتھ جنوبی افریقہ نے نہ صرف بھارت کے گھمنڈ کو توڑا بلکہ 2000ء کے بعد پہلی بار بھارت کی سرزمین پر ٹیسٹ سیریز جیت کر کرکٹ کی تاریخ میں اپنا نام سنہری حروف سے لکھ دیا۔
Discussion about this post