لکس اسٹائل 2 سال بعد ہونے جارہا ہے

پاکستان کے مقبول ترین پاپ کلچر ایوارڈ شو، لکس اسٹائل ایوارڈز، بالآخر دو سال کے طویل وقفے کے بعد اس دسمبر کراچی میں ایک بھرپور اور شاندار فزیکل تقریب کے ساتھ واپسی کے لیے تیار ہیں۔ انتظامیہ کے مطابق اس سال 24واں ایڈیشن پہلی بار مکمل شان و شوکت کے ساتھ اسٹیج پر آئے گا، جو گزشتہ برسوں کی خاموشیوں کو توڑتے ہوئے دوبارہ روشنیوں اور ستاروں سے سجی دنیا میں قدم رکھے گا۔گزشتہ کچھ برس لکس اسٹائل ایوارڈز کے لیے آزمائشوں سے کم نہ تھے۔ سال 2020 میں کورونا وبا نے تقریب منسوخ کروائی اور بجٹ کو فیشن انڈسٹری کے متاثرہ کارکنوں کی مدد کے لیے اخوت فاؤنڈیشن کے حوالے کردیا گیا۔ اسی طرح 19ویں ایڈیشن کے فاتحین کا اعلان بھی بنا کسی تقریب کے کرنا پڑا۔رواں سال مئی میں پاک بھارت کشیدگی نے 23ویں ایڈیشن کی تقریب کو ڈیجیٹل اعلان تک محدود کردیا، مگر لکس اسٹائل ایوارڈز کی روح نے ہار نہ مانی۔اب 24واں ایڈیشن ایک منفرد اور جادوئی  تھیم مرر دی میجک کے ساتھ منعقد ہوگا، جہاں پاکستانی تخلیقی صلاحیتوں کا عالمی سطح پر شان دار اظہار پیش کیا جائے گا۔اس بار پہلی مرتبہ ایک نئی ایوارڈ کیٹیگری بھی شامل کی جا رہی ہے، جو تیزی سے ابھرتی ہوئی دنیا ڈیجیٹل کنٹنٹ کریئیٹرز کے نام ہوگی۔ یونی لیور پاکستان کے جنرل منیجر پرسنل کیئر، ثمر سلطان کے مطابق اس کیٹیگری کا مقصد تخلیقی معیشت میں کنٹنٹ کریئیٹرز کے بڑھتے ہوئے اثر و رسوخ اور مستقبل کی کہانی سازی میں ان کے اہم کردار کو تسلیم کرنا ہے۔لکس اسٹائل ایوارڈز کی یہ شاندار تقریب سندھ کے دل کراچی میں منعقد ہوگی، جبکہ نامزدگیوں کا اعلان جلد کیا جائے گا۔