سپریم کورٹ کی کینٹین میں سلینڈر دھماکا، متعدد افراد زخمی

وفاقی دارالحکومت میں سپریم کورٹ آف پاکستان کی عمارت میں آج زور دار دھماکے سے ہلچل مچ گئی، جس کے نتیجے میں چار افراد زخمی ہو گئے۔ دھماکا سپریم کورٹ کی بیسمنٹ میں واقع کینٹین میں اے سی گیس کے پلانٹ میں ہوا، جس کے اثر سے عمارت لرز اٹھی اور وکلا و عملہ فوری طور پر باہر نکل آئے۔ ابتدائی اطلاعات کے مطابق اسٹاف کینٹین میں اے سی کی مرمت کا کام جاری تھا کہ اچانک یہ حادثہ پیش آیا۔ زخمیوں کو فوری طور پر اسپتال منتقل کر دیا گیا ہے۔ ذرائع نے بتایا کہ دھماکے میں سلینڈر پھٹنے کے باعث متعدد افراد زخمی ہوئے اور کینٹین کا فرنیچر بھی شدید متاثر ہوا۔ بم ڈسپوزل اسکواڈ کی ٹیم نے موقع پر پہنچ کر شواہد اکٹھے کرنا شروع کر دیے ہیں۔ حادثے سے سپریم کورٹ کی کورٹ نمبر 6 اور کینٹین کے علاقے کو نقصان پہنچا، اور دھماکے کی شدت اتنی تھی کہ عدالتوں میں موجود وکلا بھی اپنے کمروں سے باہر نکلنے پر مجبور ہو گئے۔ حکام نے دھماکے کی مکمل تحقیقات کا آغاز کر دیا ہے تاکہ واقعے کی وجوہات اور نقصان کی تفصیلات سامنے آئیں۔