اماراتی پرچم کی توہین پر 25 سال جیل ہوگی

متحدہ عرب امارات میں آج یومِ پرچم قومی جوش و جذبے، عقیدت اور اتحاد کے عزم کے ساتھ منایا جا رہا ہے۔ اس موقع پر ملک بھر میں سرکاری و نجی عمارتوں پر اماراتی پرچم لہرائے گئے، جبکہ شہریوں نے وطن سے وفاداری اور حب الوطنی کے عزم کا اظہار کیا۔ حکام نے یومِ پرچم کے موقع پر شہریوں کو متنبہ کیا ہے کہ قومی پرچم کی توہین یا غلط استعمال پر سخت قانونی کارروائی کی جائے گی۔ دبئی انتظامیہ کے مطابق اماراتی پرچم کی بے حرمتی پر 25 سال قید اور 5 لاکھ درہم تک جرمانے کی سزا دی جا سکتی ہے، جو پاکستانی کرنسی میں تقریباً 3 کروڑ 78 لاکھ روپے بنتی ہے۔

حکام نے واضح کیا کہ پرچم کے ڈیزائن کو کیک، غباروں یا تجارتی اشیاء پر استعمال کرنا توہین کے زمرے میں آتا ہے، جبکہ اشتہارات یا کاروباری مقاصد کے لیے پرچم کے استعمال کو بھی غیرقانونی قرار دیا گیا ہے۔ یومِ پرچم کے موقع پر ملک بھر میں مختلف تقریبات اور تقاریر کا اہتمام کیا گیا، جن میں متحدہ عرب امارات کے بانیوں کی خدمات کو خراجِ تحسین پیش کیا گیا اور اتحاد و ترقی کے سفر کو جاری رکھنے کے عزم کا اعادہ کیا گیا۔