وزیرِ اعظم پاکستان محمد شہباز شریف سعودی ولی عہد و وزیرِ اعظم محمد بن سلمان کی خصوصی دعوت پر دارالحکومت ریاض روانہ ہو گئے ہیں۔ وہ وہاں فیوچر انویسٹمنٹ انیشی ایٹیو (FII) کی 9ویں بین الاقوامی کانفرنس میں شریک ہوں گے۔
وزیرِ اعظم کے ہمراہ اعلیٰ سطح کا وفد بھی موجود ہے جس میں نائب وزیرِ اعظم و وزیرِ خارجہ سینیٹر محمد اسحاق ڈار، وفاقی وزیرِ خزانہ محمد اورنگزیب، وفاقی وزیرِ اطلاعات و نشریات عطاء تارڑ، اور معاونینِ خصوصی طارق فاطمی و بلال بن ثاقب شامل ہیں۔ ریاض میں منعقد ہونے والی کانفرنس میں دنیا بھر کے سربراہانِ مملکت، سرمایہ کار، پالیسی ساز اور ماہرینِ معیشت شریک ہوں گے۔ وزیرِ اعظم شہباز شریف کانفرنس میں پاکستان کے موقف کو عالمی سطح پر اجاگر کریں گے، خاص طور پر پائیدار ترقی، اقتصادی شمولیت، جدت اور عالمی جغرافیائی سیاست میں تبدیلیوں کے حوالے سے۔ دورے کے دوران وزیرِ اعظم سعودی قیادت سے اہم ملاقاتیں بھی کریں گے جن میں دونوں ممالک کے درمیان تجارت، سرمایہ کاری، توانائی اور افرادی قوت کے شعبوں میں تعاون کو فروغ دینے پر بات چیت ہوگی۔ وزیرِ اعظم شہباز شریف عالمی رہنماؤں اور بین الاقوامی اداروں کے سربراہان سے بھی ملاقات کریں گے اور پاکستان میں سرمایہ کاری اور پائیدار ترقی کے حوالے سے مشترکہ منصوبوں اور تعاون کے امکانات پر تبادلہ خیال کریں گے۔
Discussion about this post