پاک بھارت جنگ میں شاندار کارکردگی، انڈونیشیا کا چین سے جدید لڑاکا طیارے خریدنے کا فیصلہ

انڈونیشیا کی فضائیں اب ایک نئی تاریخ رقم کرنے جا رہی ہیں، وزیرِ دفاع سجافری سیامسودین نے اعلان کیا ہے کہ ملک کی فضائی قوت کو مضبوط بنانے کے لیے چین سے جدید “چینگدو جے-10” لڑاکا طیارے حاصل کیے جائیں گے۔ یہ فیصلہ نہ صرف انڈونیشیا کے دفاعی نظام میں ایک انقلابی اضافہ ہے بلکہ گزشتہ ایک دہائی میں بیجنگ سے ہونے والی سب سے بڑی دفاعی خریداری بھی قرار دی جا رہی ہے۔انڈونیشین بزنس پوسٹ کے مطابق، وزیرِ دفاع نے وزارتِ دفاع کے دفتر میں میڈیا سے گفتگو کے دوران تصدیق کی کہ جے-10 طیاروں کی خریداری طے پا چکی ہے۔ پُراعتماد لہجے میں انہوں نے کہا:

“بہت جلد یہ طیارے جکارتہ کی فضاؤں میں پرواز کرتے نظر آئیں گے۔”

اگرچہ انہوں نے ترسیل کے شیڈول یا تعداد سے متعلق تفصیلات نہیں بتائیں، لیکن ماہرین کے مطابق یہ معاہدہ انڈونیشیا کی دفاعی حکمتِ عملی میں ایک نیا سنگِ میل ثابت ہوگا۔یہ اعلان ایسے وقت سامنے آیا ہے جب صدر پربووو سوبیانتو کے چین کے حالیہ سرکاری دورے کے دوران 42 جے-10 “ویگرس ڈریگن” طیاروں کی ممکنہ خریداری پر تفصیلی بات چیت ہوئی تھی۔ڈپٹی ایئر فورس چیف ایئر مارشل ٹیڈی رزالیہادی پہلے ہی تسلیم کر چکے ہیں کہ یہ منصوبہ وزارتِ دفاع کے ایجنڈے کا حصہ ہے، اور فضائیہ کی تکنیکی ٹیم اس کے جائزے کو حتمی شکل دے رہی ہے۔ وزارتِ دفاع کے ترجمان بریگیڈیئر جنرل فریگا ویناس انکریوانگ کے مطابق، جے-10 طیاروں کا معاملہ اب بھی “پریسائی تریسولا نوسانتارا” دفاعی حکمتِ عملی کے تناظر میں زیرِ غور ہے ،  یہ وہ منصوبہ ہے جو سابق وزیرِ دفاع پربووو کے دور میں شروع ہوا تھا اور اب وزیرِ دفاع سیامسودین کے زیرِ سایہ مزید مضبوط ہو رہا ہے۔ڈپٹی وزیرِ دفاع ڈونی ارموان توافانتو نے واضح کیا کہ انڈونیشیا اپنی دفاعی ضروریات کے لیے کسی فوجی اتحاد کے محتاج نہیں۔
انہوں نے کہا:

“ہم ایک غیرجانبدار ملک ہیں۔ ہمیں یہ آزادی حاصل ہے کہ ہم جہاں سے چاہیں، اپنے دفاعی اثاثے حاصل کریں ، چاہے وہ چین ہی کیوں نہ ہو، بشرطیکہ وہ ہمارے معیار پر پورا اترے۔”

دلچسپ بات یہ ہے کہ جے-10 طیاروں کی پیشکش سب سے پہلے مئی 2025 میں چین کے ایئر شو میں سامنے آئی تھی، جہاں انڈونیشین ایئر فورس چیف ایئر چیف مارشل ایم. ٹونی ہر جونو نے شرکت کی تھی۔ اُس وقت اگرچہ کوئی حتمی فیصلہ نہیں ہوا تھا، مگر آج اس خواب نے حقیقت کا روپ دھار لیا ہے۔یاد رہے کہ یہی جے-10 طیارے پاکستان کے بیڑے کا حصہ ہیں ،  وہی طیارے جنہوں نے رواں سال مئی میں بھارت کے خلاف چار روزہ جنگ میں اپنی صلاحیتوں کا لوہا منوایا، رافیل سمیت چھ بھارتی طیارے تباہ کیے، اور اپنی برق رفتار کارکردگی سے دنیا کو حیران کر دیا۔