کراچی پولیس نے شہر میں پھیلتی ہوئی احتجاج کی خبروں کو بے بنیاد اور افواہ قرار دیتے ہوئے شہریوں سے اپیل کی ہے کہ وہ ایسی اطلاعات پر کان نہ دھریں اور معمول کے مطابق اپنے امور انجام دیں۔ پولیس کے مطابق ایک مذہبی جماعت کی جانب سے احتجاج کی کال کے بعد مختلف مقامات پر بھاری نفری تعینات کر دی گئی ہے تاکہ امن و امان کی صورتحال برقرار رہے۔ پولیس حکام نے واضح کیا کہ شہر کی مجموعی صورتحال معمول کے مطابق ہے، اس وقت کراچی کے کسی بھی علاقے میں دھرنا یا احتجاج جاری نہیں ہے۔حکام کے مطابق شہر میں دفعہ 144 نافذ ہے، لہٰذا کسی کو بھی احتجاج یا عوامی اجتماع کی اجازت نہیں، اور خلاف ورزی پر سخت کارروائی کی جائے گی۔ پولیس کا کہنا ہے کہ افواہیں سوشل میڈیا سمیت مختلف ذرائع سے پھیلائی جا رہی ہیں، جن کے باعث بعض علاقوں میں شہریوں نے خود دکانیں بند کر دیں، تاہم پولیس نے حالات مکمل طور پر قابو میں لے لیے ہیں۔
ترجمان کے مطابق نیو کراچی کے علاقے میں احتجاج کی کوشش کی گئی جسے ناکام بنا دیا گیا، مظاہرین کو منتشر کر دیا گیا جبکہ ہنگامہ آرائی میں ملوث 10 افراد کو حراست میں لے لیا گیا ہے۔ پولیس حکام کا کہنا ہے کہ نیو کراچی سندھی ہوٹل کے قریب احتجاج ختم ہو چکا ہے، علاقے کی صورتِ حال مکمل طور پر معمول پر ہے اور ٹریفک بحال کر دی گئی ہے۔ پولیس نے شہریوں سے اپیل کی ہے کہ وہ افواہوں پر یقین نہ کریں، تصدیق شدہ ذرائع سے ہی معلومات حاصل کریں اور کسی بھی مشکوک سرگرمی کی اطلاع فوری طور پر پولیس کو دیں۔
Discussion about this post