دفتر خارجہ کی تصدیق: مشتاق احمد کی واپسی کے لیے کوششیں جاری

دفترِ خارجہ نے سابق سینیٹر مشتاق احمد خان کی اسرائیلی حراست سے رہائی کے حوالے سے اہم پیشرفت سے آگاہ کیا ہے۔ ترجمان دفترِ خارجہ کے مطابق وزارتِ خارجہ، عمّان (اردن) میں موجود پاکستانی سفارت خانے کے ذریعے سابق سینیٹر کی بحفاظت واپسی کے لیے مسلسل کوششیں کر رہی ہے۔ ترجمان نے بتایا کہ اردن کی حکومت کے قیمتی تعاون سے یہ عمل آئندہ چند روز میں کامیابی سے مکمل ہونے کی امید ہے۔ دفترِ خارجہ نے اردن کی حکومت کے تعاون اور حمایت پر شکریہ بھی ادا کیا۔ واضح رہے کہ جماعتِ اسلامی کے سابق سینیٹر مشتاق احمد خان غزہ کی جانب جانے والے گلوبل صمود فلوٹیلا کے قافلے کا حصہ تھے، جس پر اسرائیلی فورسز نے حملہ کیا تھا۔ اس واقعے میں مشتاق احمد سمیت کئی افراد کو حراست میں لیا گیا تھا۔ ذرائع کے مطابق قافلے میں شامل متعدد افراد کو رہا کیا جا چکا ہے، تاہم مشتاق احمد اور چند دیگر ارکان اب بھی اسرائیلی حراست میں موجود ہیں۔