روہت شرما، بھارتی ون ڈے کرکٹ ٹیم کی قیادت سے محروم

شبمن گل نے روہت شرما سے بھارت کی ون ڈے انٹرنیشنل ٹیم کی قیادت سنبھال لی ہے، جو بھارتی کرکٹ کے ایک نئے دور کا آغاز ہے۔ ان کا پہلا امتحان اسی ماہ آسٹریلیا میں کھیلی جانے والی تین میچوں کی ون ڈے سیریز ہوگی۔

26 سالہ گل پہلے ہی بھارت کے ٹیسٹ کپتان ہیں، انہیں رواں سال مئی میں یہ ذمہ داری ملی تھی جب روہت نے ریڈ بال کرکٹ سے کنارہ کشی اختیار کی تھی۔ اس حیثیت میں ان کا پہلا امتحان انگلینڈ کے خلاف پانچ ٹیسٹ میچوں کی سیریز تھی، جو 2-2 سے برابر رہی۔ اس سے قبل دونوں فارمیٹس میں قیادت سنبھالنے سے پہلے گل کا واحد تجربہ 2024 میں زمبابوے کے دورے پر پانچ ٹی ٹوئنٹی میچوں میں کپتانی کا تھا، جب بھارت نے ٹی ٹوئنٹی ورلڈ کپ جیتنے کے بعد سینئر کھلاڑیوں کو آرام دیا تھا اور انہیں عبوری قیادت سونپی گئی تھی۔

اب آسٹریلیا کا دورہ گل کے لیے وائٹ بال کرکٹ میں پہلا مکمل امتحان ہوگا۔ ون ڈے میچز 19 اکتوبر (پرتھ)، 23 اکتوبر (ایڈیلیڈ) اور 25 اکتوبر (سڈنی) میں کھیلے جائیں گے، جس کے بعد 29 اکتوبر سے 8 نومبر تک پانچ میچوں کی ٹی ٹوئنٹی سیریز کھیلی جائے گی۔ ون ڈے اور ٹی ٹوئنٹی اسکواڈز ایک ساتھ اعلان کیے جانے کا امکان ہے۔ روہت نے دسمبر 2021 میں ویرات کوہلی کی جگہ کپتانی سنبھالنے کے بعد بھارت کی 56 ون ڈے میچوں میں قیادت کی۔ ان کی کپتانی میں بھارت نے دو آئی سی سی فائنلز تک رسائی حاصل کی: 2023 کا ورلڈ کپ  جس میں بھارت کو آسٹریلیا کے ہاتھوں شکست ہوئی، اور 2025 کی چیمپئنز ٹرافی (یو اے ای)، جس میں بھارت نے نیوزی لینڈ کو ہرا کر ٹائٹل اپنے نام کیا۔