پاکستان کے لیے ایک بڑا اعزاز — عالمی ادارے نے پورٹ قاسم کو کنٹینر پورٹ پرفارمنس انڈیکس (CPPI) 2024 میں دنیا کی نویں سب سے زیادہ ترقی کرنے والی کنٹینر بندرگاہ قرار دے دیا۔
یہ درجہ بندی 400 سے زائد بین الاقوامی بندرگاہوں کے تجزیے کے بعد سامنے آئی، جس میں صرف چار برس کے دوران پورٹ قاسم کی کارکردگی میں 35.2 پوائنٹس کا غیر معمولی اضافہ ریکارڈ کیا گیا۔ یہ کامیابی پاکستان کی عالمی تجارتی اہمیت اور عملی صلاحیتوں کا منہ بولتا ثبوت ہے۔
وفاقی وزیر بحری امور جنید انور چوہدری نے اس موقع کو "پاکستانی قوم کے لیے فخر کا لمحہ” قرار دیا۔ ان کا کہنا تھا کہ یہ کامیابی جامع پالیسی اصلاحات، مؤثر قوانین، ڈیجیٹلائزیشن، کارگو آٹومیشن اور ریئل ٹائم ٹریکنگ جیسے جدید اقدامات کے باعث ممکن ہوئی۔
انہوں نے مزید کہا کہ قاسم انٹرنیشنل کنٹینر ٹرمینل (QICT) نے عالمی معیار برقرار رکھنے میں کلیدی کردار ادا کیا ہے، جبکہ حکومت نے برسوں سے رکے ہوئے ڈریجنگ منصوبے کی منظوری بھی دے دی ہے، جس سے بڑے جہازوں کی آمدورفت اور تجارتی حجم میں نمایاں اضافہ ہوگا۔
چیئرمین پورٹ قاسم ریئر ایڈمرل (ر) معظم الیاس نے اس کامیابی کو پاکستانی افرادی قوت کی انتھک محنت اور جدید ٹیکنالوجی کا نتیجہ قرار دیا۔ ان کے مطابق پورٹ آپریشنز میں جدت اور اختراع نے پاکستان کو خطے کا ایک مضبوط لاجسٹکس حب بنا دیا ہے۔ انہوں نے کہا کہ کراچی، گوادر اور پورٹ قاسم مل کر ایک "جدید سمندری مثلث” تشکیل دے رہے ہیں، جو مستقبل میں نہ صرف درآمدات و برآمدات کی لاگت کم کرے گا بلکہ غیر ملکی سرمایہ کاری کو بھی پاکستان کی جانب راغب کرے گا۔پورٹ قاسم کی یہ عالمی سطح کی کامیابی پاکستان کے اس وژن کی عملی تعبیر ہے جس کے تحت ملک کو خطے میں ایک مستحکم بحری و تجارتی مرکز میں بدلنے کی حکمتِ عملی اپنائی گئی ہے۔
Discussion about this post